مختلفات اہل سنت: ایسے نظریات و اعمال جن کے احسن،  اکمل اور راجح  ہونے  میں جمہور علما جنھیں اہل سنت سے تعبیر کیا جاتا ہے ، کا اختلاف ہو جائے کہ کچھ کسی اور معنی کو راجح بتا رہے ہوں اور کچھ کسی اور معنی کو، تو ایسے مسائل کے اقرار و انکار یا ترک و عمل سے کوئی فرق نہیں پڑتا۔ اور ایسے ہی  نظریات و مسائل کے کسی ایک پہلو پر شدت برتنا اور ساری دنیا کو اپنی مراد پر لانے کی ضد کرنا ہی افتراق و انتشار کا سبب بنتا ہے۔ چوں کہ دین کا معاملہ لا اکراہ پر ہے، کہ یہاں کسی پر کسی قسم کا زور و جبر نہیں، حالاں کہ دین کا تعلق وحی سے ہے تو جہاں دین بالوحی اجباری نہیں، بلکہ بندوں کو حریت فکر کی آزادی دی گئی وہاں بدون الوحی کسی کو کوئی قیاسی یا تحقیقی بات کیوں کر اجباری ہو سکتی ہے۔ یہی وجہ ہے کہ جب امت کو حریت فکری سے دور رکھتے ہوئے اکراہ و اجبار سے دو چار کیا گیا تو آپسی افتراق و انتشار وجود میں آیا جس کی خلیج بیتتے دنوں کے ساتھ بڑھتی جا رہی ہے، کیوں کہ مطالبہ اجبار و اکراہ بڑھتا جا رہا ہے۔