ہندوستان کی موجودہ پارلیمانی جمہوری حکومت سخت آزمائشوں کے دور سے گذر رہی ہے، بھاجپا کی مرکزی حکومت اپنی من مانی کرنے اور حزب مخالف کو بحث کا موقع دیے بغیر قانون پر قانون بناتی جا رہی ہے، حالیہ سرمائی اجلاس میں بھی بغیر بحث کے تین نئے فوجداری بل کو قانون کی شکل دی گئی، ملک سے غداری کے قانون کو بدل کر رکھ دیا گیا، ماب لنچنگ کی انتہائی سزا سزائے موت بھی ہو سکتی ہے، اس پر بھی قانون لایا گیا، لیکن اس بل کو پاس کرنے کے لیے دونوں ایوان سے حزب مخالف کے ایک سو تینتالیس (147)ارکان کو پورے سرمائی اجلاس کے لیے معطل کر دیا گیا،پارلیامنٹ نے ایک نیا فرمان جاری کرکے ان ارکان  کے پارلیامنٹ عمارت میں داخلہ پر بھی روک لگادی ہے اور انہیں روزانہ ملنے والے بھتہ سے بھی محروم کر دیا گیا ہے۔ ان کا جرم یہ تھا کہ یہ دونوں ایوانوں میں پارلیامنٹ کے تحفظ کے مسئلہ پر وزیر داخلہ سے بیان طلب کر رہے تھے، لیکن وزیر داخلہ امیت شاہ نے منی پور معاملہ میں جس طرح کا سکوت اختیار کر رکھا تھا، اس مسئلہ میں بھی وہ اپنی ضد پر اڑے ہوئے تھے کہ ہم اس پر بیان نہیں دیں گے، حزب مخالف کا شور وغوغا بڑھتا گیا اور ایوان کے اسپیکر اور صدر نشیں نے قسطوں میں 14 دسمبر کو چودہ، 18 دسمبر کو اٹھہر(78)، 19 دسمبر کو انچاس (49) اور 20 دسمبر کو دو (2) اراکین کو معطل کردیا، اس طرح سے لوک سبھا سے معطل شدہ ارکان کی تعداد سنتانوے (97)اور راجیہ سبھا کے ارکان کی تعداد چھیالیس (46) تک پہونچ گئی، رواں پارلیامنٹ کے اس آخری اجلاس میں حزب مخالف کا پتّہ صاف کر دیا گیا اور ایک تہائی ارکان،پارلیامنٹ کے اسپیکر اور راجیہ سبھا کے صدر نشیں کے عتاب کا شکار ہوئے۔