رائے بریلی میں سید رشید احمد حسنی کے گھر پیدا ہوئے،1929 کی نیک ساعتوں میں ہویدا ہوئے۔ ابتدائی تعلیم رائے بریلی میں پائی، پھر ندوۃ العلما کی راہ اپنائی۔ دستارِ فضیلت سے سرافراز ہوئے، اہل خاندان کے لیے وجہِ امتیاز ہوئے۔ وہ آزادی کے بعد کا سال تھا، فسادات کے غم سے ہر شخص نڈھال تھا۔ ملتِ اسلامیہ زخم خوردہ تھی، روحِ مسلمانانِ ہند افسردہ تھی، انسانیت اپنے آپ سے بھی شرمندہ تھی۔ ایسے خوں چکاں حالات میں، کشمکش موت و حیات میں۔ آپ نے زخموں پر علم کا مرہم رکھنے کا فیصلہ کیا، 1949 میں ندوہ میں درس و تدریس کا سلسلہ کیا۔ شعبہ عربی ادب میں استاد ہوئے، حلقہ اساتذہ میں شاد باد ہوئے۔ مگر طلب علم کی پیاس کہیں بجھتی ہے، شدتِ ذوق و شوق و جستجو ہو تو اور بھڑکتی ہے۔ لہٰذا مزید علمی استفادے کے لیے 1950میں حجاز روانہ ہوئے، حقیقت کی تلاش میں بہ راہِ مجاز روانہ ہوئے۔ وہاں متعدد علمی شخصیات سے استفادہ کیا، لائبریریوں کو فتح پاپیادہ کیا۔ ایک سال کے بعد مادرِ علمی نے واپس بلایا، پھر تدریس کے منصب پر بٹھایا۔ 1952 میں پروفیسر اسسٹنٹ ہوئے، گویا ندوہ کے لیے سینٹ پرسینٹ ہوئے۔ شعبہ عربی کی کرسی صدارت آپ کے حصے میں آئی، جس نے آپ کی ذات سے مزید عزت پائی۔ خود کو مادر علمی کے لیے وقف کر دیا، گوشے گوشے کو اپنے علم کی روشنی سے بھر دیا۔ محنت و مشقت اور امانت و دیانت کا انعام ملا، ندوہ کا منصبِ اہتمام ملا۔ نظامت میں نیابت مستزاد ہوئی، پھر تو ہر رنجیدہ طبیعت شاد ہوئی۔ مفکر اسلام حضرت مولانا علی میاں ندوی کی رحلت سے ہرفرد کو ملال تھا، ان کے جیسا کون صاحبِ کمال تھا؟ مگر انھی کی تربیت رنگ لائی، ان کی رحلت کے بعد نظامت بھی حصے میں آئی۔ آپ کی مساعی نے ہر تاریک گوشے میں اجالا کیا، اس عہدہ جلیلہ کی شان کو دوبالا کیا۔ قاضی القضاۃ مولانا مجاہد الاسلام قاسمی کو بھی آپ پر بھرپور اعتماد تھا، ان کا دل آپ کی محبت سے آباد تھا۔ ان کے بعد مسلم پرسنل لا بورڈ کے صدر ہوئے، پہلے ہلال تھے اب بدر ہوئے، پہلے کے مقابلے کہیں زیادہ قابل قدر ہوئے۔