انسان کو اگر اچھی زبان ملی ہے تو وہ یہ سمجھے کہ اس کو بہت بڑا انعام ملا ہے ،کیونکہ زبان اور اچھی گفتگو کی وجہ سے انسان کا وقار اور بھرم قائم رہتا ہے ۔زبان درحقیقت انسان کے دل و دماغ اور شخصیت کی ترجمان ہے ،اگر ترجمانی بہتر نہیں ہے تو شخصیت بھی بہتر نہیں ہے اور ترجمانی اچھی ہے تو شخصیت بھی اچھی ہے ، جعل الفئواد علی اللسان دلیلا ۔دل ،وجدان،ضمیر ،فکر ،ہدایت کا مرکز ہے اور زبان اس کی ترجمان اور ذرئعہ اظہار ہے ۔ایمان کی سلامتی دل کی سلامتی پر ہے، اور دل کی سلامتی اس کی زبان کی سلامتی پر ہے ۔ بعض عبقری شخصیتیں اور نابغئہ روز ہستیاں صرف اس لیے مٹ گئیں اور سماج میں اپنے تمام تر علم و فضل تفوق و بلندی اور وسعت علم و تحقیق کے باوجود بے حیثیت ہو گئیں کہ انہوں نے زبان کا صحیح استعمال نہیں کیا ، انہوں لعن و طعن طنز و تعریض اور  سخت و سست  گفتگو کو اپنا وطیرہ بنایا ،ان کی زبان ہمیشہ قینچی کی طرح چلتی رہی حق و ناحق کی تمیز کے بغیر بے دریغ زبان کو استعمال کرتے رہے، انہوں کبھی اس حدیث پر نظر نہیں کی کہ آپ صلی اللہ علیہ وسلم لعان و طعان نہیں تھے اور زبان درازی سے بچتے تھے اور آپ فحش گو نہیں تھے ۔۔ بہت سے لوگوں بلکہ بہت سے پڑھے لکھے لوگوں کی زبان قینچی کی طرح بلکہ اس سے بھی تیز چلتی ہے ،غصہ ،نفرت ،حسد ،بغض اور منافقت کے الفاظ استعمال کرنے میں ان کو اللہ کا خوف ہی نہیں ہوتا ۔دل آزاری اور توہین و تذلیل کے جملے استعمال کرکے وہ سکون پاتے ہیں ،ایسے لوگوں کو ضرور یاد رکھنا چاہیے کہ قیامت کے دن اللہ تعالٰیٰ کے یہاں یہ بے لگام زبان ان کے خلاف گواہی دے گی اور کہے گی کہ اس شخص نے مجھے تیرے حکم کے خلاف استعمال کیا تھا ۔ یوم تشھد علیھم السنتھم و ایدیھم و ارجلھم بما کانوا یعلمون. (۔النور )۔وہ اس دن کو نہ بھول جائیں جب کہ ان کی اپنی زبانیں اور ان کے ہاتھ پاؤں ان کے کرتوتوں کی گواہی دیں گے ۔