فوقانیہ و مولوی امتحانات کے فارم آن لائن بھرنے کا آغاز
۲۰؍مارچ آخری تاریخ مقرر: ڈاکٹر محمد نور اسلام
ڈاکٹر محمد نور اسلام کنٹرولر آف اکزام نیشن ،بہار اسٹیٹ مدرسہ ایجوکیشن بورڈ پٹنہ نے بحکم چیرمین جناب عبدالسلام انصاری صاحب ریاست بہار کے تمام ملحقہ مدارس کے پرنسپل /صدر مدرس/طلبہ و طالبات اور گارجین حضرات کو اطلاع دی ہے کہ فوقانیہ و مولوی ۲۰۲۳ امتحانات سے متعلق رجسٹریشن /پرمیشن و دیگرامور مکمل کرلیے گئے تھے۔ البتہ فوقانیہ و مولوی(سائنس، کامرس،آرٹس اور اسلامیات) کا فارم آن لائن بھرا جانا باقی ہے ۔ درجہ فوقانیہ و مولوی امتحانات ۲۰۲۳ کا فارم ۲۰؍مارچ ۲۰۲۳ تک آن لائن بھرائے جانے کا اعلان کیا جارہا ہے۔ جس کے لیے حسب ذیل ہدایت درجہ وار فوقانیہ امیدوار کو ایک ہزار روپیے اور درجہ مولوی کے لیے گیارہ سو روپیے فی امیدوار فیس کی ادائے گی آن لائن ہی کرنی ہے۔
واضح ہو کہ سال ۲۰۲۳ کے امتحانات نئے نصاب کے مطابق منعقد ہوں گے۔ اس لیے فوقانیہ و مولوی ۲۰۲۳سے متعلق فارم بھرنے کے طریقہ کار میں بھی کچھ تبدیلیاں کی گئی ہیں۔ اس ضمن میں دفتر کے ذریعے ہدایت نامہ تیار کر بورڈ کے ویب سائٹ https://www.bsmeb.org/ پر اپلوڈ کردیا گیا ہے۔ مدارس کے صدر مدرسین اور ذمہ داران اس ہدایت کو ڈاؤنلوڈ کریں۔ اور اس میں دی گئی تمام ہدایات پر عمل کرتے ہوئے طلبہ و طالبات کا فارم بھرنا یقینی بنائیں گے۔
فارم بھرنے کے دوران صدرمدرسین پوری مستعدی کا مظاہرہ کریں گے اور امیدوار کے فارم بھرنے میں کسی طرح کی غلطی ہوتی ہے تو اس کی ذمہ داری مدارس کے صدر مدرسین پر عائد ہوگی۔ وہیں ڈاکٹر محمد نور اسلام نے ویسے امیدوار کو مطلع کیا ہے جنہوں نے سال ۲۰۲۳ کے امتحان میں شامل ہونے کے لیے رجسٹریشن کرائے تھے لیکن امتحان فارم نہیں بھر سکے یا امتحان میں کامیاب نہیں ہوئے ، یا امتحان میں کسی وجہ سے شامل ہونے سے قاصر رہ گئے ہیں تو ویسے امیدوار سال ۲۰۲۳ کے امتحان میں صرف امتحان فارم بھریں گے۔ اور اسٹریم میں مولوی آرٹس/ مولوی اسلامیات میں سے کسی ایک اسٹریم کو منتخب کریں گے۔ اسے مدارس کے صدر مدرسین اور متعلق امیدوار اس شرط کو ذہن نشین کرلیں۔
ڈاکٹر محمد نور اسلام نے مزید بتایا کہ نئے نصاب کے مطابق درجہ مولوی میں چار اسٹریم ہیں (۱) مولوی آرٹس (۲) مولوی سائنس (۳) مولوی کامرس (۴) مولوی اسلامیات ان چاروں اسٹریم میں سے کسی ایک اسٹریم کا انتخاب امیدوار کریں گے۔ اسٹریم کے انتخاب کے بعد اس میں کسی طرح کی کوئی تبدیلی دفتر کے ذریعے نہیں کی جائے گی۔ امیدوار اسی اسٹریم کے مطابق امتحان میں شامل ہوں گے۔ مزید انہوں نے واضح کیا کہ مولوی آرٹس کے زبان میں تین آپشن ۱۔ ہندی ۲۔ فارسی ۳۔ انگریزی میں سے کسی ایک موضوع کو منتخب کریں گے۔ اس کے علاوہ مولوی آرٹس میں پانچ موضوعات ۱۔ تاریخ، ۲۔ جغرافیہ، ۳۔ معاشیات، ۴۔ سیاسیات، ۵۔ ہوم سائنس میں سے کسی تین موضوعات کو منتخب کریں گے۔ اس کے علاوہ مولوی سائنس میں حیاتیات اور حساب میں سے کسی ایک کو منتخب کریں گے۔ اسی طرح مولوی کامرس میں معاشیات اور پرینیور شپ میں سے کسی ایک موضوع کو منتخب کریں گے۔
کنٹرولر آف اکزامینیشن نے مزید کہا کہ فارم آن لائن بھرنے میں کسی طرح کی دشواری ہو تو درج ذیل نمبر پر رابطہ کرسکتے ہیں۔
7481950766
