ڈھاکہ: سیل رواں ڈیسک
حلف برداری تقریب میں 13 ممالک کو شرکت کی دعوت، علاقائی سفارت کاری میں نئی پیش رفت کی توقع
بنگلادیش میں نئی حکومت کی تشکیل کا مرحلہ حتمی شکل اختیار کر گیا ہے اور نامزد وزیرِ اعظم طارق رحمان 17 فروری کو اپنے عہدے کا حلف اٹھائیں گے۔ حلف برداری کی تقریب دارالحکومت ڈھاکہ میں واقع پارلیمنٹ کمپلیکس کے احاطے میں منعقد ہوگی، جہاں کابینہ کے ارکان بھی ان کے ہمراہ حلف لیں گے۔
نامزد وزیرِ اعظم کی جماعت بنگلادیش نیشنلسٹ پارٹی (بی این پی) کے ذرائع کے مطابق اس اہم تقریب میں شرکت کے لیے 13 ممالک کو باضابطہ دعوت نامے ارسال کیے گئے ہیں۔ مدعو ممالک میں بھارت، چین، سعودی عرب، پاکستان، ترکی، متحدہ عرب امارات، قطر، مالیشیا، برونائی، شری لنکا، نیپال، مالدیپ اور بھوٹان شامل ہیں۔
سیاسی مبصرین کے مطابق تقریب میں مختلف ممالک کی شرکت بنگلادیش کی نئی حکومت کی سفارتی ترجیحات کی عکاسی کرتی ہے۔ توقع کی جا رہی ہے کہ نئی قیادت علاقائی تعاون، معاشی بحالی اور خارجہ تعلقات کے فروغ کو اپنی پالیسی کا اہم حصہ بنائے گی۔
حلف برداری کی تقریب کو نہ صرف ملکی سیاست میں ایک نئے دور کے آغاز کے طور پر دیکھا جا رہا ہے بلکہ اسے جنوبی ایشیا اور وسیع تر خطے میں سفارتی روابط کے استحکام کی جانب ایک اہم قدم بھی قرار دیا جا رہا ہے۔
