جامعہ الامام ابی الحسن علی الحسنی الندوی کے مہتمم نے کہا: تیاری مکمل۔ عمائدین شہر کے علاؤہ قرب وجوار کے اکابر علماء، طلبا و معززین کی شرکت متوقع
نمائندہ؍ سیل رواں/قصبہ دھنتولہ
قصبہ دھنتولہ، اتردیناج پور سے موصولہ اطلاع کے مطابق جامعۃ الإمام أبي الحسن علي الحسني الندوي کی جانب سے ایک اہم اعلامیہ جاری کیا گیا ہے، جس میں بتایا گیا ہے کہ ملک کے معروف عالمِ دین اور اصلاحی شخصیت حضرت مولانا الیاس ندوی بھٹکلی صاحب دامت برکاتہم 20 نومبر، بروز جمعرات کو جامعہ کا خصوصی دورہ کریں گے۔ ان کی آمد کو ادارے میں ایک علمی و روحانی موقع کے طور پر دیکھا جا رہا ہے۔
اعلانیہ میں کہا گیا ہے کہ مولانا موصوف کے استقبال کے لیے جامعہ میں تیاریاں زور و شور سے جاری ہیں۔ اس موقع پر صبح 10 بجے ایک ہمہ جہتی تعلیمی و اصلاحی پروگرام رکھا گیا ہے، جس میں طلبہ، اساتذہ، معززینِ علاقہ اور دور دراز سے آنے والے علمی حلقوں کی بڑی تعداد کی شرکت متوقع ہے۔ پروگرام میں دینی تعلیم کی اہمیت، اصلاحِ معاشرہ، طلبہ کی تربیت اور موجودہ فکری چیلنجز جیسے موضوعات زیرِ بحث آئیں گے۔
جامعہ کے مہتمم مولانا جمیل ندوی صاحب نے اپنے بیان میں کہا کہ مولانا الیاس ندوی جیسے علمی مرتبے کی شخصیت کا آنا ادارے کے لیے باعثِ فخر ہے۔ انہوں نے عوام و خواص سے اپیل کی کہ اس بابرکت مجلس میں بھرپور شرکت کریں تاکہ زیادہ سے زیادہ لوگ اس علمی و تربیتی نشست سے استفادہ کر سکیں۔
علاقے کے علمی و سماجی حلقوں نے بھی اس پروگرام کا خیر مقدم کرتے ہوئے امید ظاہر کی ہے کہ یہ مجلس مقامی نوجوانوں اور طلبہ میں علمی شوق اور دینی ذوق کو مزید تقویت دے گی۔ پروگرام کے اختتام پر دعائیہ کلمات اور شرکاء کے درمیان تبادلۂ خیالات بھی متوقع ہے۔
