مشرق وسطیٰ میں بڑھتی کشیدگی کے درمیان آبنائے ہرمز (Strait of Hormuz) کی حفاظت کے لیے اتحادی ممالک سے مدد کی امریکی اپیل کو بڑا سفارتی جھٹکا لگا ہے۔ امریکی صدر ڈونلڈ ٹرمپ کی جانب سے جنگی جہاز بھیجنے کی درخواست کو جاپان، آسٹریلیا اور جنوبی کوریا جیسے قریبی اتحادی ممالک نے مسترد کر دیا ہے۔
رپورٹس کے مطابق ٹرمپ نے چین، فرانس، جاپان، جنوبی کوریا، برطانیہ اور دیگر ممالک سے کہا تھا کہ وہ اس اہم سمندری راستے کی حفاظت کے لیے اپنی بحریہ کے جہاز تعینات کریں۔ ان کا کہنا تھا کہ چونکہ دنیا کے کئی ممالک کی تیل اور تجارتی سپلائی اسی راستے سے گزرتی ہے، اس لیے اس کی حفاظت کی ذمہ داری بھی مشترکہ ہونی چاہیے۔
آبنائے ہرمز عالمی تجارت اور توانائی کی فراہمی کے لیے انتہائی اہم سمندری گزرگاہ ہے اور دنیا کی تقریباً 20 فیصد تیل کی ترسیل اسی راستے سے ہوتی ہے۔ ایران کے ساتھ جاری جنگی کشیدگی کے باعث اس علاقے میں جہازوں کی آمدورفت متاثر ہوئی ہے اور عالمی سطح پر توانائی کے بحران کے خدشات بڑھ گئے ہیں۔
سب سے بڑا جھٹکا جاپان کی طرف سے آیا، جہاں حکومت نے واضح کیا کہ وہ ہرمز میں کسی بحری مشن پر غور نہیں کر رہی۔ جاپان کی معیشت خلیجی ممالک کے تیل پر منحصر ہے اور اس کا آئین بیرونِ ملک فوجی کارروائیوں پر سخت پابندیاں عائد کرتا ہے، اسی لیے وہ براہِ راست کسی عسکری تصادم میں شامل ہونے سے گریز کر رہا ہے۔
آسٹریلیا نے بھی ٹرمپ کی اپیل کو مسترد کرتے ہوئے کہا کہ وہ خلیج میں جنگی جہاز نہیں بھیجے گا، جبکہ جنوبی کوریا نے محتاط مؤقف اختیار کرتے ہوئے کہا کہ اس معاملے کا جائزہ لیا جائے گا لیکن فی الحال کوئی منصوبہ نہیں ہے۔
یورپی ممالک بھی اس معاملے میں محتاط دکھائی دے رہے ہیں۔ برطانیہ اور فرانس جیسے ممالک کھل کر اس امریکی اتحاد میں شامل ہونے سے گریز کر رہے ہیں کیونکہ انہیں خدشہ ہے کہ ایسا کرنے سے خطے میں ایک بڑی جنگ بھڑک سکتی ہے۔
ماہرین کے مطابق اتحادی ممالک کی ہچکچاہٹ اس بات کی علامت ہے کہ آبنائے ہرمز کے بحران میں امریکہ کو وہ عالمی حمایت حاصل نہیں ہو رہی جس کی واشنگٹن کو توقع تھی، جس کے باعث ٹرمپ اس معاملے میں سفارتی طور پر قدرے تنہا نظر آ رہے ہیں۔
