نئی دہلی: امریکہ اور ایران کے درمیان حالیہ جنگ بندی پر بھارت نے اپنے پہلے سرکاری ردِعمل میں اس پیش رفت کا خیرمقدم کیا ہے اور خطے میں امن و استحکام کے لیے مذاکرات اور سفارت کاری کو ناگزیر قرار دیا ہے۔
وزارتِ خارجہ (MEA) نے اپنے بیان میں کہا کہ وہ مشرقِ وسطیٰ کی صورتِ حال پر گہری نظر رکھے ہوئے ہے اور خطے میں کشیدگی پر تشویش برقرار ہے، تاہم جنگ بندی کو ایک مثبت قدم کے طور پر دیکھا جا رہا ہے۔
بیان میں کہا گیا کہ ایسے پیچیدہ تنازعات کا حل طاقت کے استعمال میں نہیں بلکہ بات چیت اور سفارتی ذرائع میں پوشیدہ ہے، اس لیے تمام فریقین کو تحمل کا مظاہرہ کرتے ہوئے مذاکرات کی راہ اختیار کرنی چاہیے۔
حکومتِ ہند نے یہ بھی واضح کیا کہ وہ خطے میں دیرپا امن کے قیام کے لیے کسی بھی تعمیری کوشش میں اپنا کردار ادا کرنے کے لیے تیار ہے۔
قابلِ ذکر ہے کہ امریکہ اور ایران کے درمیان حالیہ جنگ بندی سے عالمی سطح پر کشیدگی میں وقتی کمی آئی ہے، جبکہ تیل کی قیمتوں اور مالیاتی منڈیوں پر بھی اس کے مثبت اثرات دیکھنے میں آئے ہیں۔
