وزیر اعلیٰ مغربی بنگال کا مرکزی ایجنسی پر سنگین الزام، تفتیش کے طریقۂ کار پر سوالات
کولکاتا: مغربی بنگال کی وزیر اعلیٰ ممتا بینرجی نے مالدہ ضلع میں پیش آئے حالیہ واقعہ پر سخت ردعمل ظاہر کرتے ہوئے الزام عائد کیا ہے کہ اصل مجرم فرار ہو چکے ہیں، جبکہ National Investigation Agency (این آئی اے) بے گناہ افراد کو گرفتار کر کے ہراساں کر رہی ہے۔
ایک عوامی جلسہ سے خطاب کرتے ہوئے وزیر اعلیٰ نے کہا کہ مالدہ کے موتھا باری علاقے میں پیش آنے والے واقعہ کے حقیقی ذمہ دار عناصر گرفتاری سے بچ نکلے، مگر تفتیشی ایجنسی مقامی نوجوانوں کو نشانہ بنا رہی ہے۔ انہوں نے دعویٰ کیا کہ بڑی تعداد میں بے قصور افراد کو حراست میں لیا گیا ہے، جس سے عوام میں بے چینی اور خوف کی فضا پیدا ہو رہی ہے۔
ممتا بنرجی نے مزید کہا کہ چند شرپسند عناصر نے عدالتی افسران کا گھیراؤ کیا اور موقع سے فرار ہو گئے، لیکن اس کے بعد کی کارروائی میں عام شہریوں کو بلا وجہ ملوث کیا جا رہا ہے۔ انہوں نے اس طرز عمل کو انصاف کے تقاضوں کے منافی قرار دیتے ہوئے کہا کہ اس سے قانون پر عوام کا اعتماد مجروح ہو سکتا ہے۔
انہوں نے عوام سے اپیل کی کہ وہ اشتعال انگیزی سے گریز کریں اور قانونی معاملات میں مناسب فورمز سے رجوع کریں۔ ساتھ ہی وزیر اعلیٰ نے مرکز کی حکمراں جماعت پر بھی بالواسطہ تنقید کرتے ہوئے الزام لگایا کہ مرکزی ایجنسیوں کا استعمال سیاسی مقاصد کے لیے کیا جا رہا ہے۔
واضح رہے کہ مالدہ میں حالیہ دنوں عدالتی افسران کے قافلے کے گھیراؤ کا واقعہ پیش آیا تھا، جس کے بعد معاملہ کی جانچ این آئی اے کے سپرد کی گئی ہے۔ اس معاملے کو لے کر ریاستی اور مرکزی حکومت کے درمیان سیاسی کشیدگی میں اضافہ دیکھا جا رہا ہے۔
