مولانا شفیق الرحمن ندویؒ

 مولانا شفیق الرحمن ندوی ” علمی وقار اور تہذیبی متانت کا پیکر مجسم تھے ، ان کے سراپا میں کشش کے بہت سے عناصر موجود تھے ، میانہ قد ، سانولا رنگ ، کشادہ پیشانی پر فکر و تدبر کی سلوٹیں ، مسکراتی ہوئی آنکھیں جن سے معصومیت اور حیا ٹپکی پڑتی تھی ، جھومتی رفتار مثل ابریشم گفتار ، دھیمی آواز ، مرنجاں مرنج ، شگفته دل ، چہرہ شرعی داڑھی سے مزین ، جسم میں بجلی کی بے تابیاں سمٹی ہوئی ، بشرے پر امید کی شفق اور تبسم کی بکھری ہوئی افشاں . اُن کی کتاب زندگی کا اگر فنی تجزیہ کیا جائے تو فروتنی و تواضع ، خاموش طبعی ، سادہ مزاجی ، باضمیری، ایثارکیشی ، نام و نمود سے نفور ، جرات مندی ، بلند حوصلگی اور عزیمت ، ملنساری ، حق پژوہی ، خودستائی اور خود نمائی سے نفرت ، افق نگاہ کی وسعت ، محنت اور انہاک ، محبت و الفت ، آسودہ تمنا اور محدود طلب ، خیالات کی جدت ، طبیعت کی خود داری ، گہری شرافت اور انسانی بلندی ، عزت نفس ، عجب و کبر سے عاری ، دینی شعائر کی عظمت اور کثرت عبادت و ریاضت اس کے چند جلی عنوانات ہوں گے ، حب جاہ سے مرحوم کی بے نیازی اور استغناء کا یہ عالم تھا کہ انھوں نے نہ تو لکھنؤ میں کوئی آشیانہ بنایا اور نہ اپنے آبائی وطن میں موروثی جائیداد کے علاوہ کوئی حیثیت بنائی ، مالی اعتبار سے ہلکے پھلکے ہونے میں وہ بلاشبہ ایک قابل رشک مرد مومن تھے . واقعہ یہ ہے کہ مولانا شفیق الرحمن علیہ الرحمہ ندوہ کی پوری طویل مدت تدریس کے دوران اپنی محنت و اخلاص ، مقصد میں انہاک ولگن اور بلندی کردار کے باعث اکابر واصاغر سب میں یکساں ہر دلعزیز رہے ، ندوہ میں وہ آخری بار اپنی پشت پر تمام کشتیاں جلا کر آئے اور تادم واپسیں تدریسی خدمات کے علاوہ دیگر امور مفوضہ باحسن وجوه انجام دیتے رہے ، ان کو عربی زبان و ادب پر کامل عبور کے ساتھ علم فقہ میں بھی بڑی مہارت حاصل تھی ، چنانچہ انھوں نے آخری وقت تک فقہ حنفی کی مشہور زمانہ کتاب "هداية “ کا درس بھی دیا ، اُن کو فقہ کے پیچیده ترین مسائل آسان ترین زبان میں تجزیہ کر کے طلبہ کو ذہن نشیں کرانے میں بڑا کمال حاصل تھا ، اسی باعث طلبہ اُن کے بہت دلدادہ رہتے تھے ، علاوہ ازیں مرحوم نے نورالایضاح کے طرز پر فقہ کی ایک درسی کتاب بھی ” الــفــقـــه المیسر ” کے نام سے تالیف کی تھی ، جو بقول مولانا مجیب اللہ ندوی رحمۃ اللّٰہ علیہ سہل ممتنع کا بہترین نمونہ ہے ، نیز اس سے اُن کی عربی زبان پر غیر معمولی قدرت کا بھی اندازہ ہوتا ہے ، یہ کتاب بیحد مقبول ہوئی اور ندوہ کی شاخوں اور ملحقہ مدارس کے نصاب درس میں داخل ہے . بعض اہل علم نے مرحوم سے اس کتاب کی افادیت کے پیش نظر اس کا دوسرا حصہ مرتب کرنے کی فرمائش کی تھی ، مگر پھر وہ ضعف صحت اور مختلف امراض کا شکار ہو گئے اور یہ کام آگے نہ بڑھ سکا . علمی و تدریسی مشاغل کے علاوہ مولانا مرحوم میں انتظامی صلاحیتیں بھی بدرجہ اتم موجود تھیں ، ندوہ کے ارباب حل و عقد جو کام بھی اُن کے سپرد کرتے وہ اُس کو پوری تندہی ، احساس ذمہ داری اور لگن و انہماک کے ساتھ انجام دیتے تھے ، چنانچہ وہ ہر تعلیمی سال کے آغاز پر مہتمم دارالعلوم کی نیابت میں تعلیمی گھنٹیوں کا نظام الاوقات مرتب کرتے تھے ، اس اہم کام کی نزاکت و حساسیت اہل نظر سے مخفی نہیں ہے ، یہ ذمہ داری بڑی دیانتداری اور شفافیت کی طالب ہوتی ہے ، ہر اُستاذ اپنی مرضی اور سہولت کے مطابق گھنٹیوں کا طالب ہوتا ہے ، مولانا مرحوم سب کے جذبات و احتیاجات کو پیش نظر رکھ کر اتنے حسن و خوبی کے ساتھ نظام الاوقات ترتیب دیتے تھے کہ کسی کو اُن سے شکوہ سنجی کی گنجائش نہ رہ جاتی تھی ، بقول استاذی مولانا سعید الرحمن ندوی (مہتمم دارالعلوم ) یہ کام بڑی دقت نظر اور محنت کا طالب تھا لیکن مولانا مرحوم اس کو کچھ اس انداز سے ترتیب دیتے تھے کہ کسی کو شکایت کا موقع نہ ملتا تھا ، اس خصوص میں مرحوم نے ندوہ کے ذمہ داروں کا غیر معمولی اعتماد و اعتبار حاصل کر لیا تھا . مولانا مرحوم کے لائق و فائق فرزند مولانا طارق شفیق ندوی نے ( جو اپنے والد مرحوم پر مستقل کتاب تالیف کر رہے ہیں ) اپنے ایک مضمون میں لکھا ہے کہ والد ماجد علیہ الرحمہ کوئی ذمہ داری قبول کرتے تو اس کو پورے انہماک و خلوص اور محنت ولگن کے ساتھ انجام دیتے تھے ، میں نے دیکھا کہ مرحوم نظام الاوقات بنانے سے قبل وضو کرتے ، والدہ سے چائے طلب کرتے ، مجھ سے پان منگواتے اور ہر طرح سے یکسو ہوکر کام میں لگ جاتے تھے ، فرماتے کہ یہ بہت نازک اور دشوار کام ہے، آپ سب دعا کیجیے کہ میں اس اہم ذمہ داری سے کما حقہ عہدہ برآ ہوسکوں، میں نے یہ بھی دیکھا کہ والد ماجد علیہ الرحمہ نظام الاوقات ترتیب دیتے وقت اساتذہ کے مذاق و مزاج ، اُن کی علمی وفنی صلاحیت اور اُن کی اعمارسب باتوں کو پیش نظر رکھتے ، مقامی اساتذہ بوجوہ اپنی سہولت کے مطابق مخصوص گھنٹیوں کے خواہشمند ہوتے ، وہ ان سب کی بھی رعایت کرتے ، واقعہ یہ ہے کہ والد صاحب میں معاملہ فہمی اور شعور و ادراک کی موہوبی صلاحیت تھی ، وہ ندوہ کے ارباب حل و عقد کے اعتماد پر پورا اترنے کی دل و جان سے کامیاب ترین کوشش میں لگے رہتے تھے ۔