بھگود گیتا کے مفسر شری نواس آچاریہ داس نے گیتا میں کرشن اور ارجن کی گفتگو کے مختلف ابواب کے حوالے سے اپنے ستائیس صفحے پر جو خلاصہ پیش کیا ہے اس میں انسانی تخلیق کا ایک بنیادی فلسفہ یوں بیان کیا ہے کہ گیتا ایک (ویدک )یعنی غیبی علم ہے جسے کرشن نے ارجن کو سنایا لیکن ارجن سے پہلے  یہ علم سوریودیہ یعنی وایوسوان کو دیا گیا ۔سوریودیہ نے منو کو بتائی اور منو نے اشواقو کو ۔(غالبا اشواقو کا یہ لفظ اسحاق ہے جو حضرت ابراہیم کے صاحبزادے اسحاق علیہ السلام سے پہلے حضرت نوح کے کسی اولاد میں سے رہے ہوں اور انہوں نے ایک لمبے دور کی حکمرانی کی ہو۔ اشواقو کا یہ ذکر رامائن میں بھی آتا ہے اور کہا جاتا ہے کہ رام اسی دور میں پیدا ہوۓ )یہ بھی ممکن ہے کہ  ہندو تاریخ کے خلط ملط کی وجہ سے اشواقو یعنی اسحاق کی شخصیت کو کسی اور دور سے جوڑ دیا گیا ہو ۔ بدقسمتی سے میں نے اپنی کتاب "ایودھیا کی تلاش ” جو ابھی میرے ذہن میں بے ربط مسودے کی شکل میں ضبط ہے  یہ ثابت کرنے کی کوشش کی ہے کہ کرشن اور رام ہندو کتابوں کے خیالی کردار نہیں بلکہ یہ کردار زبانوں کی منتقلی کے ظلم کا شکار ہو گئے ۔میں نے تفصیل سے لکھا ہے کہ کیوں کرشن ہی موسی ہیں اور ارجن ہی موسی کے چچا زاد بھائی ہارون ہیں جنھیں کبھی ارون یا کبھی ارجن سے مخاطب کیا جاتا ہے ۔یاد رہے زبان کے فرق سے جب انگریز ہند کو الف کے لہجے میں انڈ کہہ سکتے ہیں تو ہارون کا ارون ہونا کوئی مشکل بات نہیں ہے  اور سنسکرت ابراہیم علیہ السلام کی زبان ہے جو ان کے دور میں عراق اور شام کے علاقوں میں بولی جاتی تھی اور یہ ابراہیم ہی رام ہیں اور مکہ اصل ایودھیا ہے جسے قرآن میں بلدالامین یعنی امن کا شہر کہا گیا ہے ۔ آریہ بھارت کے نہیں مشرقی وسطی سے ہجرت کرکے آۓ ہوۓ لوگ ہیں یہ بات بھارت کی  مستند تاریخ میں درج ہے ۔ہاں آریہ  حضرت داؤد علیہ السلام کی امت سے ہیں جن پر زبور نازل ہوئی ابھی کسی مورخ نے یہ ثابت کرنے کی جرات نہیں کی لیکن چاروں ویدوں کا گہرائی  سے مطالعہ کرنے والوں کیلئے یہ سمجھنا بہت مشکل نہیں کہ وید بھی آسمانی کتابیں ہیں  ۔اس کی ایک وجہ جو میں یہاں  آپ سے بتانا چاہتا ہوں وہ یہ کہ جتنی بھی آسمانی کتابیں ہیں وہ عام بول چال یا نثر کی زبان میں نازل نہیں ہوئیں ۔ بلکہ جیسے کہ قرآن کی ساری آیات ایک ردھم ،تسلسل اور موسیقی کے طرز پر ہیں ویدوں میں جتنے بھی سلوک ہیں وہ بھی ایک ردھم میں ہیں ۔اس کی سائینسی وجوہات بھی یہ بتائی جاتی ہے کہ ردھم کی زبان (اسے شاعری کی زبان بھی کہہ لیں )کو حفظ کرنا بنسبت نثر کے بہت آسان ہوتا ہے ۔شاید  اسی وجہ سے ہزاروں سال پہلے نازل ہونے والی آسمانی کتابیں  توریت ،بائیبل قرآن اور ہندوؤں کے وید ان مذاھب کے علماء کے حافظے میں رہیں ورنہ اس دور میں لکھنے کا رواج تو نہ کے برابر تھا یا پتھروں پر کھودائی کر کے لکھ لیا جاتا تھا  ۔ ہم  پچھلے مضمون ہندو مذہب حقیقت اور بدگمانی کی آئینے میں یہ بھی لکھ چکے ہیں کہ گیتا کے مطابق آریہ کے معنی  پڑھے لکھے ہوتے ہیں ۔دوسرے لفظوں میں برہمن خود کو آریہ کہتا ہی اس لئے ہے کہ وہ  اہل کتاب ہیں ۔لیکن چونکہ یہ اہل کتاب کا جملہ ابھی تک عربی میں ہی استعمال ہوا ہے اس لئے برہمن خود بھی اہل کتاب کے تصور سے نابلد ہیں ۔یہ بھی یاد رہے کہ جیسے یہودو نصارٰی اپنے اہل کتاب ہونے کی وجہ سے مشرکین مکہ کو امی کہتے تھے آریہ یعنی برہمن بھی جب ہندوستان آۓ تو انہوں نے خود کو آریہ یعنی اہل کتاب کہا اور باقی ہندوستان کے باشندوں کو اناریہ (یہ گیتا کے الفاظ ہیں ) کہا یعنی غیر اہل کتاب یا امی ۔گیتا نے اس آریہ اور اناریہ کی تشریح بھی یوں کی ہے کہ خدا کے اس پیغام کو صرف آریہ ہی سمجھ سکتا ہے اناریہ نہیں ۔جیسا کہ اسی گیتا میں جو گیتا یا بگوان پر ایمان لاتے ہیں انہیں بھگت کہا ہے یعنی اہل ایمان اور جو گیتا اور کرشن کا مزاق اڑاتے ہیں یا ان کے بھگوان ہونے سے انکار کرتے ہیں انھیں اسور Asur یعنی کافر یا ناستک کہا ہے ۔مطلب صاف ہے کہ کافر ، مسلمان اور اہل ایمان ہی نہیں مومن کا تصور بھی ہندو کتابوں میں ان کی اپنی زبان اور لہجے میں موجود ہے ۔یہ بھی یاد رہے کہ ہندو کتابوں میں جو بار بار ویدک گیان کی بات آتی ہے تو اس سے مراد غیب یا وحی کا علم ہی ہے اور اسی بنیاد پر ہندوؤں کی چار مشہور کتابوں کو وید کہا گیا ہے یعنی جس میں غیب کی باتیں ہیں ۔