وہ میری علمی زندگی (پی ایچ ڈی اور پی ڈی ایف) کے نگراں بھی رہے، اس معنی کر اوروں کے مقابلے مجھے زیادہ ملنے جلنے کا موقع ملتا تھا یہ اور بات ہے کہ ان کی سختی اور ڈانٹ ڈپٹ کی وجہ سے کم ہی ملنا چاہتا تھا، لیکن جب بھی ان کے آستانے پر جبیں سائی کی کچھ نہ کچھ  ناقابل فراموش سبق سیکھا، وہ مجھے ہمیشہ کہتے کہ جسیم جس طرح پیسہ کمانے کے لیے بھاگ دوڑ کرتا رہتا ہے، مجھے نہیں لگتا کہ اس کو کسی جگہ ملازمت پانے کے لیے سفارش کی ضرورت پڑے گی،  دہلی کی میری بھاگ دوڑ والی زندگی اس معنی کر رہی کہ میں نے جے آر ایف اور پوسٹ ڈاکٹوریٹ جیسی خطیر رقم والی فیلوشپ  یا پھر گیسٹ فیکلٹی والی تنخواہ پاتے ہوئے بھی پارٹ ٹائم اخبار کی ملازمت یا سمینار میں شرکت یا پھر رسائل وجرائد کے لیے با معاوضہ مضامین لکھنے میں خود کو مصروف رکھتا، میرے اس عمل سے وہ کسی درجے میں خوش بھی تھے کہ یہ اپنی لائف خود ہی سیٹ کر لے گا، اللہ نے ان کی یہ تمنا پوری کردی، لیکن رنج اسی بات کا ہے کہ وہ اب اس دنیا میں ہے ہی نہیں کہ وہ مجھے دیکھ پاتے کہ میں کہاں سے کہاں پہنچا، اور یہاں پہنچانے کا سبب کون بنا۔