عید میلادالنبی ﷺ کے جواز کی شرعی دلیلیں

 ممانعت کی دلیل اور اس کا جائزہ:

ممانعت کی سب سے بڑی دلیل یہ پیش کی جاتی ہے کہ اگر یہ دین سے ثابت ہوتا تو صحابہ کرام رضوان اللہ علیہم اجمعین ایسا ضرور کرتے ۔ہاں یہ یقینا سب سے بڑی دلیل ہے، مگر معلوم ہونا چاہیے کہ صحابہ کرام رضوان اللہ علیہم اجمعین جس طرح کی محبت کیا کرتے تھے اس کے عشر عشیر کو بھی ہم نہیں پہونچ سکتے ۔ہاں وہ ایک دن کیلئے محبت نہیں کرتے تھے ۔لہذا!  ایک دن محبت کا اظہار کرنا خود اپنے آپ میں ایمان کی کمزوری کی علامت ہے ،مگر کم از کم ایک دن تو محبت رسول ﷺ کرلینے دیا جانا چاہیے ۔

صحابہ کرام کا عمل ہی ہر معاملہ میں دلیل ہے۔ اس پہ ہمارا ایمان ہے، کیوں کہ دین ان کے واسطے سے پہونچا ہے، مگر ساتھ ہی یہ بھی طے کرنا ہوگا کہ جوکام صحابہ کرام نہیں کرتے تھے، اسے ہم بھی نہ کریں ۔صرف عید میلادالنبی ﷺ میں صحابہ کرام کی پیروی باقی میں من مانی بھی ایمان کی علامت نہیں ہے۔ مثلا مساجد کی زینت کی حرمت پہ دلیل بھی ہے اور عمل صحابہ کرام رضوان اللہ علیہم اجمعین سے ثبوت بھی مگر ہم نے اس پہ کبھی بحث نہیں کی ۔

حضرت عمر رضی اللہ عنہ نے باضابطہ طور پہ مسجدوں کے گنبدوں کو مسمار کرایا اورفرمایا کہ یہ یہود ونصاری کی پہچان ہے۔ مگر ہم گنبدوں کے ساتھ منارے بھی رکھتے ہیں وغیرہ ۔

سن ۹۱ ہجری تک سارے صحابہ دنیا سے رخصت ہوگئے ،اس وقت تک کسی مسلک کا وجود نہیں تھا ،ان کے نزدیک اتباع کا مطلب صرف کتاب وسنت تھا، کسی کے قول کو بالا دستی نہیں تھی ،مگر آج مسلک باضابطہ دین کی ایک شاخ بن چکی ہے ۔تو پھر اسے بھی حرام ہونا چاہیے ۔

دارالعلوم اور جامعات اپنی گولڈن جبلی اور سلور جبلی مناتی ہیں، اسے کوئ حرام نہیں کہتا ۔

تراویح میں ختم قرآن مجید اور پھر مٹھائیوں کی تقسیم۔ حفاظ کرام کی دستاربندی ۔اماموں کی تنخواہ یہ سب حرام ہونے چاہئیں  ،کیونکہ کتاب وسنت سے براہ راست ان اعمال کی بھی دلیل نہیں ملتی ہے۔

مسلم جماعتیں اپنی جماعتوں کی یوم تاسیس مناتی ہیں، اسے کوئ حرام نہیں کہتا ۔

تو پھر نبی صلی اللہ علیہ وسلم کی سیرت کو عام کرنے کے لئے جب ہم حکومت سے حاصل شدہ تعطیل کا استعمال کر لیتے ہیں، تو اس دن ایک اجتماع کر لینے میں کیا حرج ہے، اسے ازسر نو غور کرنا چاہیے ۔

ہاں ایک ہی دن کیوں ،پورے مہینے اور سال بھر سیرت النبی صلی اللہ علیہ وسلم پہ کانفرنسیں ہونی چاہیے ۔

دنیا کے سامنے اہتمام کے ساتھ سیرت النبی صلی اللہ علیہ وسلم کا تعارف کرانے کا یہ اچھا موقع ہوتا ہے۔

 آپ صلی اللہ علیہ وسلم نے فرمایا ہے کہ ” من احبنی کان معی فی الجنة "

جو مجھ سے محبت کرے گا میرے ساتھ جنت میں ہوگا۔سیرت النبی کے جلسے بھی محبت رسول میں ہی کئے جاتے ہیں لہذا عین ممکن ہے کہ یہ عمل جنت میں لے جانے والا ہو ۔انما الاعمال بالنیات۔