یہاں اس آیت کے ضمن میں اس نکتہ کی طرف بھی علماء نے اشارہ کیا ہے، کہ ہدایت کے سلسلہ میں سب سے اہم چیز مادئہ اعتراف ہے، یعنی جب بھی سچ سامنے آئے اور حقیقت آشکار ہوجائے تو بندئہ مومن کو سر تسلیم خم کر دینا چاہیے اور حق کو حق مان اور تسلیم کر لینا چاہیے ۔ خدائی قانون،ضابطہ اور الہی فیصلہ ہے کہ ہدایت صرف ان لوگوں کو ملتی ہے، جن کے اندر تسلیم و رضا کا جذبہ ہو کہ جب اس کے سامنے حق اور سچائی آئے تو وہ فورا اس کو مان لیں ۔ خواہ سچائی بظاہر ایک ادنی معمولی اور کم حیثیت و بے رتبہ آدمی کے ذریعہ سامنے آئی ہو ،خواہ اس کو ماننا اپنے آپ کو غلط قرار دینے کے ہم معنی ہو ،خواہ اس کو مان کر اپنی زندگی کا نقشہ و پلان ادھورا درہم برہم ہوتا ہوا نظر آئے، عہدہ و منصب اور اقتدار چھنتا ہوئے دکھے  ۔جن کے اندر یہ حوصلہ ہوگا ، وہی سچائی کو پاسکے گا ۔ جو لوگ یہ چاہیں کہ وہ سچائی کو اس طرح مانیں کہ ان کے کرو فر شان و شوکت،ان کی عظمت ، طمطراق، بڑائی اور برتری قائم رہے ،اس کی حیثیت اور درجہ میں کسی حال میں کمی نہ آئے، وہ اپنے مریدین اور مسترشدین کی نگاہ میں بڑے بنیں رہیں ،ان کا رعب، دبدبہ اور حیثیت قائم رہے، وہ عہدے اور منصب کے لائق نہ ہوں، پھر بھی وہ عہدے پر چھل ،بل اور کل کے ذریعے فائز اور براجمان ہوجائیں ۔ ایسے لوگوں کو سچائی نہیں ملتی اور وہ حق سے دور ہوجاتے ہیں ۔ جو آدمی حق کی خاطر اپنی بڑائی اور برتری کو کھو دے، اس کو ٹھوکر مار دے ،وہ سب سے بڑی چیز اور سب سے قیمتی دولت پالیتا ہے ۔ اور وہ خدا کی عظمت ،بڑائی اور کبریائی ہے۔ جب بندے میں یہ خوبی پیدا ہوجاتی ہے اور وہ اس مقام تک رسائی حاصل کر لیتا ہے تو پھر وہ خدا سے اس قدر قریب ہوجاتا ہے اور اس کی زندگی میں خدا اس طرح شامل  ہوجاتا ہے، کہ وہ اس کی یادوں کے ساتھ سوئے اور وہ اس کی یادوں کے ساتھ جاگے ۔ اس کے خوف اور امید کے جذبات تمام تر خدا کے ساتھ وابستہ ہوجائیں ۔ وہ اپنا کل سرمایہ پونجی اور اثاثہ اس طرح خدا کے حوالے کر دیتا ہے کہ اس میں کچھ بچا کر نہیں رکھتا ۔ ایسے ایمان والوں کے لئے جنت کی کھلی ہوئی بشارت ہے کہ ان لوگوں کی آنکھیں جنت کے ابدی باغوں میں ٹھنڈی ہوں گی ۔