سوامی آویمکتیشورانند کے خلاف تحقیقات کا آغاز
پریاگ راج (یوپی): اتر پردیش کے شہر پریاگ راج کی ایک خصوصی عدالت نے معروف مذہبی شخصیت سوامی آویمکتیشورانند سرسوتی اور ان کے شاگرد کے خلاف ایف آئی آر درج کرنے کا حکم دیا ہے۔ عدالت نے یہ کارروائی مبینہ طور پر نابالغوں کے ساتھ جنسی زیادتی کے الزامات سے متعلق درخواست پر سماعت کے بعد کی۔
میڈیا رپورٹس کے مطابق یہ حکم پی او سی ایس او ایکٹ کے تحت دائر کی گئی درخواست پر دیا گیا، جس میں دعویٰ کیا گیا تھا کہ سوامی کے آشرم میں نابالغ بچوں کے ساتھ نامناسب سلوک کیا گیا۔ عدالت نے پولیس کو ہدایت دی ہے کہ باقاعدہ مقدمہ درج کر کے تفتیش کا آغاز کیا جائے۔ اس سے قبل عدالت میں متعلقہ نابالغوں کے بیانات بھی قلم بند کیے گئے تھے۔
دوسری جانب سوامی آویمکتیشورانند نے تمام الزامات کو سختی سے مسترد کرتے ہوئے انہیں بے بنیاد اور سازش قرار دیا ہے۔ ان کا کہنا تھا کہ سچائی جلد سامنے آ جائے گی اور وہ قانونی کارروائی کا سامنا کرنے کے لیے تیار ہیں۔ انہوں نے کہا:
میں یوگی آدتیہ ناتھ نہیں ہوں کہ اپنے خلاف درج مقدمہ واپس کرا لوں۔ ہم قانون کا سامنا کریں گے اور حقیقت سامنے آئے گی۔
سوامی نے الزام لگایا کہ شکایت کنندہ کا پس منظر مشتبہ ہے اور یہ معاملہ ان کی ساکھ کو نقصان پہنچانے کی کوشش ہے۔ انہوں نے شفاف اور غیر جانبدارانہ تحقیقات کا مطالبہ کرتے ہوئے یقین دہانی کرائی کہ وہ تفتیشی اداروں سے مکمل تعاون کریں گے۔
پولیس کی جانب سے عدالتی حکم کے مطابق مقدمہ درج کیے جانے کے بعد اب باضابطہ تفتیش کا عمل شروع ہوگا، جس کے نتائج کا انتظار کیا جا رہا ہے۔
