یعنی ایک قاتل کی معافی اورجان بخشی، صرف اور صرف اس کے first affected اور worst sufferer ، چاہے مقتول کے والدین ہوں، یا اس کی بیوہ ہو ، یامقتولہ کا شوہر ہو یا اولاد ہو یا جو قریب ترین رشتہ دار ہوں، یا برادری کے لوگ ہوں، صرف و ہی کرسکتے ہیں۔ دیگر اداروں یا افراد کو یہ حق حاصل نہیں ہوگا کہ قاتل کی سزاکے لیے کی جانے والی رحم کی درخواست کو منظور کریں اور اس کی سزا میں کسی تخفیف و رعایت کے حقدار بن جائں۔ظاہر ہے کسی جج، کسی قاضی، کسی سربراہِ حکومت ، کسی صدر مملکت کا اس جرم میں کوئی ذاتی نقصان کہاں ہوا ہوتا ہے کہ وہ مجرم کی سزا میں معافی کے اعلان کا استحقاق حاصل کرلے! نقصان تو اُن بوڑھے والدین کا ہوا ہے جن کا بیٹا ان سے چھین لیا گیاہے۔ نقصا ن تو اس یتیم معصوم بچے کا ہوا ہے، جس کے سر کواس کے اپنے والد یا والدہ کے سایۂ عاطفت سے محروم کر دیا گیا ہے۔ نقصان تواُس بیوہ کا ہوا ہے جس کا سہاگ چھین لیا گیا ہے۔ نقصان تو اس شخص کا ہوا ہے جس کی محبوب بیوی کو موت کے گھاٹ اتار دیا گیا ہے۔معاف تو وہ کریں، کسی دباﺅ کے بغیر۔ اگر وہ ہر جانہ یا compensation کےلئے تیار ہوں بطورِ صدقہ، تو وہ ضرور کریں اپنے رب کی رضا اور خوشی کی خاطر۔ معافی کے اس عمل میں کسی بیرونی دباؤ کا رول اگر نہ ہو تو حکومتِ وقت اور اس کے قوانین کو اس کا تعاون کرنا چاہیے۔اسی طرز عمل میں human rights کی حقیقی قدر شناسی تلاش کی جاسکتی ہے۔ایسا ہی قانون انسانیت کے اعلیٰ جوہر سے قریب تر ہوسکتا ہے۔اور اسی سے انصاف کے تقاضے پورے کیے جانا ممکن ہو سکے گا۔اور اسی قانون میں انسانی جذبات کا کما حقہ لحاظ رکھا جا سکے گا۔ یہ قانون ارحم الراحمین کے قانون کے سوا کس کا ہوسکتا ہے؟