ایسے لوگوں کے بارے میں میں نے ایک مولوی صاحب سے مشورہ کیا کہ حضرت کچھ مسلم نوجوان اور دوشیزائیں کچھ زیادہ ہی سوشل میڈیا پر مصروف ہیں۔ انہوں نے کہا کہ وہ بھی اسی معاشرے کا حصہ ہیں اور اگر موسیقی غزل گیت یا کسی ناول اور تبصرے میں فحاشی نہ ہو تو کسی کو ان کے اس عمل سے روکنا بھی فطرت کے خلاف ہے اور چبرا روکا گیا تو ممکن ہے وہ ڈپریشن کا شکار ہونے لگیں ۔ اس لئے اگر لوگ اپنے غم کو ہلکا کرنے کیلئے سوشل میڈیا کا استعمال کرتے ہیں تو انہیں ایسا کرنے دیں ۔ہاں جو چوبیس گھنٹوں میں پانچ چھ پوسٹ کرتے ہیں وہ ایک ترتیب اور معمول بنا لیں تو انہیں نیند نہ آنے کی بھی شکایت نہیں رہے گی اور فرض عبادتوں سے بھی فیض یاب ہوتے رہیں گے‌ ۔میں نے کہا وہ کیسے ۔ انہوں نے کہا کہ ایسے لوگوں کو چاہئے کہ وہ اپنی پوسٹ تہجد کی نماز پڑھ کر شروع کریں اور عشاء کی نماز تک ہر نماز بعد ایک تبصرہ پوسٹ کرکے کچھ لایک کمنث اور تبصروں کو دیکھ کر دس اگیارہ بجے تک سو جایا کریں ۔ان چھ وقت کی نمازوں کی پابندی سے ادائیگی کی وجہ سے ہو سکتا ہے کہ شیطان ایسے لوگوں کو سوشل میڈیا سے ہی بیزار کر دے ۔میں یہاں ارسطو سے زیادہ مولوی صاحب کی بات سے اس لئے متفق ہوں کیوں کہ ایک بار اسی طرح کا معاملہ امام ابوحنیفہ ر ع کے سامنے آیا تھا ۔کہتے ہیں کہ ایک بار ایک شخص ان کے پاس آیا ۔اس نے کہا کہ حضرت میں اپنی ایک قیمتی چیز کہیں رکھ کر بھول گیا ہوں کوئی ایسا وظیفہ بتائیں کہ وہ مل جاۓ ۔ابو حنیفہ نے کہا کہ جاؤ تم نفل نماز پڑھنا شروع کر دو ۔ابھی وہ شخص کچھ رکعت ہی پڑھا سکا تھا کہ اسے وہ جگہ یاد آ گئی جہاں اس نے اپنی چیز رکھی تھی ۔وہ شخص ابوحنیفہ کے پاس آیا کہ حضرت آپ کو کیسے پتہ کہ اس طرح نماز پڑھنے سے وہ چیز مجھے مل جائے گی ۔انہوں نے کہا کہ شیطان کو تمہارا عبادت میں مشغول رہنا اچھا نہیں لگا اور اس نے فوراً تمہیں وہ مقام یاد دلا دیا تاکہ تم اور عبادت نہ کر سکو ۔یہ ایک طئے شدہ حقیقت بھی کہ اللہ نے ہر مسئلے کا حل تدبیر کے ساتھ ساتھ  تذکیر میں بھی رکھا ہے لیکن لوگ توکل کی بجائے اپنے مسائل کا حل صرف اسباب اور تدبیر میں ہی تلاش کرتے ہیں !