قانونی مسافروں اور طلبہ کو پریشانی نہ ہو: جے شنکر۔ مارکو روبیو نے کہا: نئی امریکی ویزا سختیاں ہندوستان مخالف نہیں
نئی دہلی: ہندوستان کے وزیر خارجہ ایس جے شنکر نے امریکی وزیر خارجہ مارکو روبیو کے ساتھ ملاقات کے دوران امریکی ویزا میں تاخیر اور سختیوں کا مسئلہ اٹھایا۔ جے شنکر نے کہا کہ قانونی طریقے سے امریکہ جانے والے ہندوستانی شہریوں، طلبہ اور پیشہ ور افراد کو غیر ضروری مشکلات کا سامنا نہیں ہونا چاہیے۔
نئی دہلی میں دونوں رہنماؤں کے درمیان ہونے والی بات چیت کے بعد مشترکہ پریس کانفرنس سے خطاب کرتے ہوئے جے شنکر نے کہا کہ ہندوستان اور امریکہ کے تعلقات میں عوامی روابط کو خاص اہمیت حاصل ہے۔ انہوں نے واضح کیا کہ ہندوستان غیر قانونی نقل مکانی کے خلاف تعاون کا حامی ہے، لیکن جائز دستاویزات کے ساتھ سفر کرنے والوں کو پریشانی میں ڈالنا مناسب نہیں۔
اس موقع پر امریکی وزیر خارجہ مارکو روبیو نے کہا کہ امریکہ کی نئی ویزا پالیسی یا امیگریشن سختیاں خاص طور پر ہندوستان کو نشانہ بنانے کے لیے نہیں ہیں۔ ان کے مطابق امریکہ اس وقت اپنے امیگریشن نظام میں وسیع اصلاحات کر رہا ہے، جس کے باعث ویزا کے عمل میں وقتی تاخیر اور دشواریاں پیش آرہی ہیں۔
روبیو نے کہا کہ امریکہ کو گزشتہ برسوں میں غیر قانونی تارکین وطن کے سنگین بحران کا سامنا کرنا پڑا، اسی وجہ سے ویزا اور امیگریشن نظام میں تبدیلیاں ضروری ہوگئی ہیں۔ تاہم انہوں نے یقین دہانی کرائی کہ اصلاحات مکمل ہونے کے بعد ہندوستانی طلبہ، سائنس دانوں اور پیشہ ور افراد کے لیے نظام مزید بہتر اور مؤثر ہوگا۔
ملاقات کے دوران دونوں رہنماؤں نے تجارت، دفاع، توانائی، ہند-بحرالکاہل خطے کی صورتحال اور مغربی ایشیا کے حالات سمیت کئی اہم بین الاقوامی امور پر بھی تبادلۂ خیال کیا۔
