اسلام کا تصور علم اور عہد جدید کے چیلنجز

مذہب اسلام کی آمد سے قبل جس طرح دنیا کی مذہبی، اخلاقی، معاشرتی، معاشی اور سیاسی صورتحال تشویشناک تھی اسی طرح تعلیمی صورت حال بھی تشویشناک تھی ،یورپ وقت کی تمام مہذب قوموں سے الگ تھلگ تھا اور جہالت کے گھٹا ٹوپ اندھیرے میں جی رہاتھا،چین ہندوستان مصر، بابل، یونان اور روما دنیا بھر میں علم کے مراکز سمجھے جاتے تھے لیکن علم کے یہ مراکز طلبہ کو علم کے بجائے توہمات و خرافات کا درس دے رہے تھے،ہندوستان نے طب، الٰہیات اور ہیئت کے میدان میں جبکہ چین نے اخلاقیات کے میدان میں گرچہ قدم بڑھا دییے تھے لیکن ان کے علم. اور نصاب کا بیشتر حصہ بھی سحرو طلسم پر ہی مشتمل تھا ، لے دے کر دنیا کا ایک خطہ یونان تھا جہاں بلند پایہ علماء اور فلاسفہ پیدا ہوچکے تھے لیکن اہل علم جانتے ہیں کہ وہاں کتنے زمانے تک علم کا دائرہ محدود رہا اور بعد میں جب وسعت پیدا ہوئی بھی تو ان اہل علم فلاسفہ کو کیسی سخت اذیتوں کا سامنا کرنا پڑا جنہوں نے ان کے توہمات کاساتھ نہیں دیا. اگر مجموعی طور پر بات کی جائے تو اس حقیقت سے انکار کی گنجائش نہیں ہے ہے کہ بعثت نبوی سے قبل دنیا میں کہیں بھی یا تو علم نہیں تھا یا کسی معنی میں تھا تو عام لوگوں کی پہونچ سے دوراور روز مرہ کی زندگیوں سے بے دخل تھا لیکن جب رسالت مآب صلی اللہ علیہ وسلم کی بعثت ہوئی اور اسلام کی مکمل شکل کا ظہور ہوا تومذہب اسلام نے نہ صرف حصول علم کی عام اجازت دی بلکہ اپنے ماننے والوں پر حصول علم کو لازم قرار دیا، اور بتایا علم حاصل کرنا تمام مسلمانوں پر فرض ہے، حصول علم کو فرض قرار دینے کا فیصلہ کوئی معمولی فیصلہ نہیں تھا بلکہ بجا طور پر ایک انقلابی فیصلہ تھا، تاریخ کا مطالعہ بتاتا ہے کہ اس فیصلے اثرات پوری دنیا پر جستہ جستہ پڑے، نسل انسانی عمومی طور پر سلسلہ تعلیم سے منسلک ہوئی، اور دنیا بھر میں آہستہ آہستہ علم روز مرہ کی زندگیوں میں داخل ہوا، لیکن رسالت مآب صلی اللہ علیہ وسلم کے علم کو فرض قراردینے کا کیا مطلب ہے؟ کیا واقعی ہر مسلمان پر علم حاصل کرنا فرض ہے، اگر ہاں اور بلاشبہ ہاں تو کونسا علم؟ دینی یا دنیوی یا دونوں؟ کیا علم کو دینی اور دنیوی خانوں میں تقسیم کرنا درست ہے؟ یہ وہ سوالات ہیں جن کے جوابات دییے بغیر نہ کوئی نتیجہ نکالا جاسکتا ہے، نہ اسلام کے تصور علم کو واضح کیا جاسکتا ہے، اور نہ ہی اس حوالے سے کوئی مناسب رائے قائم کی جاسکتی ہے۔