کشمیر فائلس بنانے والوں نے محض پیسے کمائے لیکن کشمیری پنڈتوں کو پھر روتا ہوا چھوڑ دیا ، ان کے مسائل پر کسی نے کوئی توجہ نہیں دی۔ دہشت گردی پر بات کرنے والے ہمارے وزیر اعظم سے جب جموں و کشمیر کے سابق گورنر ستیہ پال ملک نے پلوامہ پر ہوئے حملے پر سوال کیا تو وہ خاموش ہو گئے ۔ کوئی جواب نہیں دیا ۔ دہشت گردی کو ختم کرنے کا دعویٰ کرنے والی مودی حکومت نے نہیں بتایا کہ آخر گزشتہ روز ہمارے 6؍جوان دہشت گردانہ حملے میں کیسے شہید ہوگئے ۔ اب آپ پلان بنائو کچھ بھی کرو ۔ ایئر اسٹرائک کرو لیکن سوال یہ ہے کہ ہماری خفیہ ایجنسیاں کیا کر رہی تھیں ؟ کیسے ہمارے 6؍جوان شہید ہوئے ۔ بس نعرے بازی ہی ہوتی رہے گی ۔ گزشتہ 9؍سال میں کیا کیا ؟ کرناٹک میں الیکشن جیتنے کے لیے اب بجرنگ بلی کا سہارا ہی بچا ہے ۔ ڈبل انجن کی حکومت نے کیا کام کیا ہے کیا اس کا ذکر کہیں سننے میں آیا کیا ؟ میں اب تک کئی اداریہ کرناٹک کے الیکشن پر لکھ چکا ہوں ،سب میں یہی کوشش رہی ہے کہ الیکشن عوام کے اصل مسائل پر ہونے چاہئے ۔ مہنگائی ، بے روزگاری ، ریاست کی ترقی ، تجارت ، تعلیم ان پر بات ہونی چاہئے اور عوام کو ان کی بنیاد پر ووٹ کرنا چاہئے ۔ کرناٹک کا روشن مستقبل کیسے ہو اس پر غور کرنا چاہئے ، اس پر ایجنڈہ تیار ہوناچاہئے ۔ افسوس کی بات کہہ لیجئے یا یہ کہئے کہ کانگریس بھی نادانی کر رہی ہے ، وہ بھی گودی میڈیا اور بی جے پی کی چال میں پھنس گئی اور اس نے بھی اپنا ٹریک بدل لیا ۔ اس نے بھی اعلان کر دیا کہ وہ اگر حکومت میں آئی تو مندروں کی تعمیر کرائے گی۔ کیا مندروں کی تعمیر کرانے کا کام ایک سیکولر حکومت کا ہے ؟ تو پھر اس کو یہ بھی اعلان کرنا چاہئے کہ وہ مسجدیں بھی تعمیر کرائے گی اور گورودوارہ اور چرچ بھی تعمیر کرائے جائیں گے ۔ یہ کیا بات ہے ؟ عبادت گاہیں خود عوام اپنے طور پرتعمیر کرتے ہیں ، حکومت کا کام اسکول ، کارخانے ، انڈرسٹریز تعمیر کرانے کا ہے جیسا کہ ماضی میں ہوا ہے ۔