اسلام پور اردو اکاڈمی کا شاندار ادبی و ثقافتی و تقسیم انعامات پروگرام اور وائس چیئرمین کے اہم اعلانات

رپورٹ: محمد شہباز عالم

سیتل کوچی کالج، سیتل کوچی، کوچ بہار، مغربی بنگال

مغربی بنگال اردو اکاڈمی شاخ اسلام پور نے 23 نومبر 2024ء کو اپنے سالانہ ادبی، ثقافتی، اور تقسیم اسناد پروگرام کا کامیاب انعقاد کیا۔ یہ تقریب مغربی بنگال اردو اکاڈمی اسلام پور برانچ کے جدید اور شاندار ہال میں منعقد ہوئی، جو مغربی بنگال اردو اکاڈمی کی تمام برانچز میں سب سے نمایاں ہے۔ پروگرام کے دوران ادبی و ثقافتی سرگرمیوں کے ساتھ ساتھ نمایاں کارکردگی دکھانے والے طلبا و طالبات کی حوصلہ افزائی کی گئی اور کئی اہم اعلانات کیے گئے جو اردو زبان و ثقافت کے فروغ کے لیے سنگ میل ثابت ہوں گے۔

پروگرام کے صدر اور مہمانِ خصوصی:

پروگرام کی صدارت عزت مآب جناب محمد ندیم الحق صاحب، ممبر راجیہ سبھا و وائس چیئرمین مغربی بنگال اردو اکاڈمی، نے فرمائی، جبکہ مہمان خصوصی جناب محمد غلام ربانی صاحب، وزیر برائے محکمۂ غیر روایتی و قابل تجدید ذرائع توانائی، حکومت مغربی بنگال تھے۔

مہمانانِ اعزازی میں جناب ستیہ جیت برمن، وزیر تعلیم برائے اسکول، حکومت مغربی بنگال، جناب عبد الکریم چودھری، ایم ایل اے، اسلام پور، محترمہ پمپا پال، سبھادی پتی، اتر دیناج پور ضلع پریشد، جناب حمید الرحمن، ایم ایل اے، چوپڑا، جناب منهاج العارفین آزاد، ایم ایل اے، چاکولیہ، جناب مشرف حسین، ایم ایل اے، ایٹاہار، جناب گوتم پال، ایم ایل اے، کرن دیکھی، جناب کرشنا کلیانی، ایم ایل اے، رائے گنج، جناب غلام رسول، نائب سبھادی پتی، اتر دیناج پور ضلع پریشد شامل تھے، جبکہ مہمانان ذی وقار میں جناب جوبی تھومس، ایس پی، اسلام پور پولیس ڈسٹرکٹ، محترمہ پریا یادو، آئی اے ایس، ایس ڈی او، اسلام پور، نزهت زینب، ڈبلو بی سی ایس (ایگزیکٹو)، سکریٹری مغربی بنگال اردو اکاڈمی اور ڈاکٹر صادق الاسلام، چیئرمین انقلاب فاؤنڈیشن و ٹی ایم سی لیڈر شامل تھے۔

پروگرام کا انعقاد:

تقریبِ تقسیمِ اسناد کا آغاز صبح 11:30 بجے افتتاحی و خصوصی خطابات سے ہوا۔ اس سے پہلے صبح 9 بجے طلبا و طالبات کے لیے ادبی و ثقافتی مقابلے جیسے سیٹ اینڈ ڈرا اور کوئز مقابلے کا انعقاد کیا گیا، جس میں بچوں نے اپنی تخلیقی صلاحیتوں کا مظاہرہ کیا۔ دوپہر 2 بجے خطابات کے بعد نمایاں کارکردگی دکھانے والوں کو انعامات سے نوازا گیا۔ نظامت کے فرائض ڈاکٹر دبیر احمد، چیئرمین ایوارڈ سب کمیٹی نے انجام دیے، جبکہ ہدیۂ تشکر جناب سید محمد شهاب الدین حیدر، چیئرمین فنکشن سب کمیٹی نے پیش کیا۔

ندیم الحق صاحب کے مسرت بخش اہم اعلانات:

اس تقریب کی سب سے نمایاں بات عزت مآب جناب محمد ندیم الحق صاحب کے اہم اعلانات تھے، جنہوں نے اردو زبان کے فروغ اور علاقہ اسلام پور کی ترقی کے لیے درج ذیل اقدامات کا وعدہ کیا:

• 1. بجٹ کا 40 فیصد تعلیم پر خرچ کیا جائے گا:

مغربی بنگال اردو اکاڈمی کا بجٹ اب 18 کروڑ روپے ہے، جس کا 40 فیصد حصہ بچوں کی تعلیم پر خرچ کیا جائے گا۔ واضح رہے کہ یہ بجٹ جناب محمد غلام ربانی صاحب کے وزارتِ مدرسہ تعلیم و اقلیتی امور کے دوران بڑھایا گیا تھا، ورنہ پہلے یہ بجٹ بہت کم تھا۔

• 2. اردو مترجمین کی تقرری:

اسلام پور کے سرکاری دفاتر میں اردو مترجمین مقرر کیے جائیں گے، بشرطیکہ علاقے کے لوگ اپنی درخواستیں، خطوط، اور شکایات اردو زبان میں لکھیں۔

• 3. تعلیمی اور تربیتی منصوبے:

اسلام پور اردو اکاڈمی میں کمپیوٹر کلاسز، ٹیوشن سینٹر، اور بنگلہ آموزش سینٹر قائم کیے جائیں گے، جیسا کہ کولکاتا اردو اکاڈمی میں موجود ہیں۔

• 4. سینٹرل لائبریری اور ریڈنگ روم:

اسلام پور اردو اکاڈمی میں ایک سینٹرل لائبریری اور ریڈنگ روم قائم کیا جائے گا، جہاں طلبا و عوام مطالعے اور تحقیق کی سہولت حاصل کر سکیں گے۔

• 5. ادبی و ثقافتی پروگرامز کے لیے ہال کی دستیابی:

اسلام پور اکاڈمی کے ہال کو مختصر کرائے پر ادبی و ثقافتی پروگرامز کے لیے فراہم کیا جائے گا تاکہ مقامی لوگ آسانی سے پروگرام منعقد کر سکیں۔

• 6. اردو میڈیم بی ایڈ/ڈی ایل ایڈ کالج:

اسلام پور میں ایک اردو میڈیم بی ایڈ/ڈی ایل ایڈ کالج کا قیام عمل میں لایا جائے گا، جو علاقے کے طلبا کے لیے پیشہ ورانہ تعلیم کے مواقع فراہم کرے گا۔

• 7. یو پی ایس سی اور ڈبلیو بی سی ایس کوچنگ سینٹر:

کولکاتا حج ہاؤس کے طرز پر اسلام پور اردو اکاڈمی میں یو پی ایس سی اور ڈبلیو بی سی ایس امتحانات کی تیاری کے لیے کوچنگ اینڈ گائیڈنس سیل قائم کیا جائے گا۔

اسلام پور اردو اکاڈمی کی انفرادیت:

اسلام پور اردو اکاڈمی، جس کا شمار مغربی بنگال اردو اکاڈمی کی برانچز میں ہوتا ہے، اپنی شاندار عمارت اور سہولیات کے باعث سب سے نمایاں ہے۔ مغربی بنگال اردو اکاڈمی کا ہیڈ آفس کولکاتا میں ہے، اور اس کی دو برانچز ہیں: آسنسول اور اسلام پور۔ لیکن اسلام پور برانچ اپنی شاندار تعمیرات اور جدید سہولیات کی وجہ سے منفرد مقام رکھتی ہے۔ اس انفرادیت پر علاقے کے باشندگان نے وزیر اعلیٰ محترمہ ممتا بنرجی صاحبہ کا شکریہ ادا کیا، جنہوں نے اسلام پور کے عوام کی ترقی کے لیے خصوصی دلچسپی لی ہے۔

اختتامیہ:

اسلام پور اردو اکاڈمی کا یہ ادبی و ثقافتی اور تقسیم انعامات پروگرام نہ صرف اردو زبان و ادب کے فروغ کے لیے ایک سنگ میل ہے، بلکہ یہ علاقے کی علمی و ثقافتی ترقی کی بھی ضمانت ہے۔ عزت مآب محمد ندیم الحق صاحب کے اعلانات نے اس تقریب کو مزید یادگار بنا دیا اور عوام کے دلوں میں ایک امید پیدا کی کہ اسلام پور اردو اکاڈمی مستقبل میں ایک نمایاں تعلیمی و ثقافتی مرکز بنے گی۔