مدھیہ پردیش کے وزیر اعلیٰ موہن یادو سے متعلق زمین خرید کے تنازع نے سیاسی ماحول کو گرما دیا ہے۔ انگریزی اخبار "انڈین ایکسپریس” کی ایک تحقیقاتی رپورٹ کے بعد کانگریس نے حکومت کو سخت تنقید کا نشانہ بنایا، جبکہ بھارتیہ جنتا پارٹی (بی جے پی) نے وزیر اعلیٰ کا دفاع کرتے ہوئے الزامات کو سیاسی قرار دیا۔ تاہم، رپورٹ میں اٹھائے گئے بعض اہم سوالات، خصوصاً وزیر اعلیٰ سے منسلک کمپنی کی جانب سے زمین کی خریداری کے معاملے پر پارٹی نے کوئی واضح جواب نہیں دیا۔
بی جے پی کے ریاستی صدر ہیمنت کھنڈیلوال نے کہا کہ کانگریس بے بنیاد اور گمراہ کن الزامات کے ذریعے وزیر اعلیٰ کی شبیہ خراب کرنے کی کوشش کر رہی ہے۔ ان کا کہنا تھا کہ موہن یادو یا ان کے خاندان نے کوئی غیر قانونی کام نہیں کیا اور تمام لین دین قانون کے مطابق انجام پائے ہیں۔
دوسری جانب؛ "انڈین ایکسپریس” کی تحقیقاتی رپورٹ میں دعویٰ کیا گیا ہے کہ موہن یادو کے خاندان اور ان سے وابستہ کمپنیوں نے گزشتہ چند برسوں کے دوران اجین اور اس کے اطراف میں بڑی مقدار میں زمین خریدی۔ رپورٹ کے مطابق، ان میں سے ایک کمپنی میں موہن یادو اور ان کی اہلیہ کی اکثریتی شراکت داری ہے، جس نے وزیر اعلیٰ بننے کے بعد بھی زمینیں خریدیں۔ رپورٹ میں یہ بھی کہا گیا کہ انہی علاقوں میں بعد ازاں سرکاری سڑکوں اور دیگر ترقیاتی منصوبوں پر کام شروع ہوا، جس کے باعث زمینوں کی قیمتوں میں نمایاں اضافہ ہوا۔
کانگریس نے اس معاملے کو مفادات کے ٹکراؤ (Conflict of Interest) کا معاملہ قرار دیتے ہوئے عدالتی یا آزادانہ تحقیقات کا مطالبہ کیا ہے۔ پارٹی کا کہنا ہے کہ اگر وزیر اعلیٰ یا ان کے خاندان کو سرکاری منصوبوں سے پہلے معلومات حاصل تھیں تو اس کی غیر جانبدارانہ جانچ ضروری ہے۔
اس تنازع کے دوران بی جے پی نے اگرچہ وزیر اعلیٰ کے خلاف لگائے گئے تمام الزامات کو مسترد کیا، لیکن تحقیقاتی رپورٹ میں کمپنی کی جانب سے زمین خریدنے اور ان زمینوں کی مالیت میں اضافے سے متعلق اٹھائے گئے سوالات پر کوئی تفصیلی وضاحت سامنے نہیں آئی۔
وزیر اعلیٰ موہن یادو نے بھی ان الزامات کو مسترد کرتے ہوئے کہا ہے کہ ان کی زمینوں میں 2023 کے بعد کوئی اضافہ نہیں ہوا اور میڈیا رپورٹ میں حقائق کو توڑ مروڑ کر پیش کیا گیا ہے۔
