ممبئی: ریاست مہاراشٹر میں ایک نیا سیاسی تنازعہ اس وقت کھڑا ہوگیا جب ریاستی کانگریس صدر ہرش وردھن سپکال کے ایک بیان پر حکمراں جماعت بھارتیہ جنتا پارٹی (بی جے پی) نے سخت اعتراض کرتے ہوئے ان کے خلاف ایف آئی آر درج کرا دی۔
اطلاعات کے مطابق سپکال نے ایک تقریب کے دوران مراٹھا حکمراں چھترپتی شِواجی مہاراج اور میسور کے فرمانروا ٹیپو سلطان کا تقابلی ذکر کیا تھا۔ ان کا کہنا تھا کہ جس طرح شِواجی مہاراج نے سوراج اور خودمختاری کا تصور پیش کیا، اسی طرح ٹیپو سلطان نے بھی انگریزوں کے خلاف مزاحمت کی اور بہادری کا مظاہرہ کیا۔
بی جے پی نے اس بیان کو نامناسب قرار دیتے ہوئے کہا کہ شِواجی مہاراج مہاراشٹر کے عوام کے لیے عقیدت اور فخر کی علامت ہیں اور ان کا کسی دوسرے تاریخی شخصیت سے موازنہ عوامی جذبات کو مجروح کرتا ہے۔ پونے شہر کے بی جے پی لیڈر دھیراج گھاٹے کی شکایت پر پولیس نے مقدمہ درج کرلیا ہے۔
پولیس حکام کے مطابق متعلقہ دفعات کے تحت کیس درج کیا گیا ہے اور معاملے کی تفتیش جاری ہے۔ ابھی تک کانگریس کی جانب سے اس قانونی کارروائی پر تفصیلی ردعمل سامنے نہیں آیا، تاہم سیاسی حلقوں میں اس بیان کو لے کر بحث تیز ہوگئی ہے۔
واضح رہے کہ مہاراشٹر میں تاریخی شخصیات کے حوالے سے بیانات اکثر سیاسی تنازعہ کا سبب بنتے رہے ہیں، اور موجودہ واقعہ بھی ریاستی سیاست میں نئی گرما گرمی کا اشارہ دے رہا ہے۔
