دین اور مسلمان (قسط ۶)

جس طرح دنیا سے نیک اور صالح لوگوں کے گزر جانے سے دلی تکلیف ہوتی ہے اسی طرح دنیا سے کوئی بدمعاش اور شیطان گزر جاۓ تو اہل ایمان کا خوش ہونا فطری بات ہے لیکن ان کی رہنمائی کرنے والا اصل شیطان تو بہر حال ابھی بھی زندہ ہے ۔وہ اپنے مکر سے کہاں باز آنے والا اور جس نے حضرت موسی کی قوم کو گمراہ کرنے کیلئے سامری کا جال بچھایااس کا آخری حربہ دجال ابھی بھی اپنی قید سے رہائی کیلئے بے چین ہے ۔طارق فتح ہوں یا سلمان رشدی یا وسیم رضوی ،ارشاد مانجھی یا اسری نعمانی یا تسلیمہ نسرین یہ سب شیطان کے قبیلے کے لوگ ہیں ۔بلکہ یوں کہا جاۓ کہ اس وقت دجالی میڈیا جو کچھ خبریں ،تجزیے اور اصلاح معاشرے کے عنوان سے پیش کر رہا ہے یہ سب تلبیس حق و باطل کا ایسا ملغوبہ ہے جو دھیرے دھیرے لوگوں کو آمادہ ہی اس بات پر کر رہا ہے کہ لوگ جھوٹ کو سچ سمجھنا شروع کر دیں اور ایک دن جب یہ دجل دجال کی شکل میں ظاہر ہو تو لوگوں کیلئے اس پر ایمان لانا بہت مشکل نہ ہو ۔اس میں کوئی شک نہیں کہ ان چینلوں سے کچھ سچ اور حق بھی پیش کیا جاتا ہے تاکہ اہل حق کا وہ آزاد خیال طبقہ جو نیو ورلڈ آرڈر کے لباس میں مغربی ترقی سے مرعوب ہے وہ اسے آزادی کی نیلم پری ہی سمجھتا رہے ۔ جیسا کہ پچھلی کچھ دہائیوں سے کچھ اسلامی اسکالروں نے اسلام اور دعوت دین کا لبادہ اوڑھ کر بہت ہی مہذب انداز میں ان لوگوں کو بھی متاثر کیا جو کبھی حکومت الہیہ کے داعی تھے ۔طارق فتح اور سلمان رشدی تو خیر کھل کر اپنی اسلام اور مسلمان دشمنی کا مظاہرہ کرتے تھے اور کرتے ہیں لیکن ان سے زیادہ اسلام اور مسلمانوں کو ان سے نقصان پہنچ رہا ہے جنھیں مسلمانوں کا ایک بڑا طبقہ اس لئے اپنا مسیحا اور مہدی تصور کرتا ہے کہ یہ نہ ہوتے تو مسلمانوں کو جدید ترقی کا مفہوم کون بتاتا۔