کولکاتا: مغربی بنگال میں انتخابات کی تیاریوں کے سلسلے میں منعقد ایک میٹنگ کے دوران ووٹر فہرست سے نام حذف کیے جانے کے معاملے پر ترنمول کانگریس (ٹی ایم سی) کے نمائندوں اور چیف الیکشن کمشنر گیانیش کمار کے درمیان تکرار ہو گئی۔
میٹنگ میں ٹی ایم سی کے وفد نے الزام لگایا کہ ووٹر لسٹ سے بڑی تعداد میں لوگوں کے نام حذف کیے جا رہے ہیں، جس سے انتخابات کی شفافیت پر سوالات کھڑے ہوتے ہیں۔ اس معاملے پر گفتگو کے دوران ماحول کشیدہ ہو گیا اور دونوں فریقوں کے درمیان تلخ جملوں کا تبادلہ ہوا۔
ٹی ایم سی کے لیڈروں کا کہنا تھا کہ ووٹروں کے نام اس طرح حذف کیے جانے سے کئی افراد اپنے حقِ رائے دہی سے محروم ہو سکتے ہیں۔ پارٹی نے اس معاملے پر الیکشن کمیشن سے وضاحت طلب کی۔
میٹنگ میں موجود ٹی ایم سی کے ایک وزیر نے دعویٰ کیا کہ بات چیت کے دوران چیف الیکشن کمشنر نے غصے میں آواز بلند کی اور انگلی اٹھا کر بات کی، جس پر وفد نے اعتراض کیا۔
یہ میٹنگ الیکشن کمیشن کی ٹیم کے مغربی بنگال کے دورے کے دوران منعقد ہوئی تھی، جہاں آئندہ انتخابات کے لیے انتظامات کا جائزہ لیا جا رہا ہے۔
