ممبئی: بالی ووڈ کے معروف اداکار نانا پاٹیکر کا جمعرات کو 75 سال کی عمر میں انتقال ہوگیا۔ اطلاعات کے مطابق انہیں شدید کارڈیک اریسٹ ہوا، جس کے بعد انہیں گوا کے ڈونا پاؤلا واقع مَنی پال اسپتال لے جایا گیا، جہاں ڈاکٹروں کی تقریباً 45 منٹ کی مسلسل کوشش کے باوجود انہیں بچایا نہیں جا سکا۔ انہیں صبح تقریباً 5:20 بجے مردہ قرار دیا گیا۔
مَنی پال اسپتال کے شعبۂ آنکولوجی کے سربراہ ڈاکٹر شیکھر سالکر نے خبر رساں ایجنسی اے این آئی کو بتایا کہ نانا پاٹیکر کو مسلسل 45 منٹ تک سی پی آر دیا گیا، تاہم ان کی جان نہیں بچائی جا سکی۔ معاملے میں میڈیکو لیگل کیس درج کرلیا گیا ہے اور پوسٹ مارٹم کیا جائے گا۔
نانا پاٹیکر کا اصل نام وشواناتھ پاٹیکر تھا۔ انہوں نے 1978 میں فلم ’گمن‘ سے اپنے فلمی کیریئر کا آغاز کیا اور ہندی و مراٹھی سنیما میں اپنی منفرد اداکاری کے باعث نمایاں مقام حاصل کیا۔ ’انکش‘، ’پرتی گھات‘، ’سلام بمبئی!‘، ’پرندا‘، ’کرانتی ویر‘، ’خاموشی: دی میوزیکل‘، ’اب تک چھپن‘ اور ’راج نیتی‘ سمیت متعدد فلموں میں ان کی اداکاری کو بے حد سراہا گیا۔
’ویلکم‘ اور ’ویلکم بیک‘ میں اودے شیٹی کے کردار نے انہیں عام ناظرین میں بھی خاصی مقبولیت دلائی۔ اپنے طویل فلمی سفر کے دوران نانا پاٹیکر نے تین قومی فلم ایوارڈ حاصل کیے، جبکہ 2013 میں انہیں پدم شری سے بھی نوازا گیا۔
نانا پاٹیکر آخری مرتبہ 2026 میں ریلیز ہونے والی فلم ’او رومیو‘ میں نظر آئے تھے۔ ان کے انتقال کی خبر سامنے آنے کے بعد فلمی دنیا میں غم کی لہر دوڑ گئی ہے اور مداح و فن کار سوشل میڈیا کے ذریعے تعزیت کا اظہار کر رہے ہیں۔
