سرکاری اسکولوں میں تعلیم کا گرتا معیار​

ڈانٹنا نہیں، مارنا نہیں ،اور فیل نہیں کرنا ۔ یہ ہے موجودہ تعلیمی پالیسی کا ایک اہم حصہ۔ یعنی آج اسکولوں میں امتحانات تو بدستور ہوتے ہیں لیکن کسی بچے کو کسی کلاس میں فیل نہیں کیا جاتا اور نہ ہی کسی بچے کو کسی طرح کی کوئی سزا دی جا تی ہے۔ یہاں تک کہ کسی بچے کو سزا کے طور پر کلاس سے باہر بھی نہیں نکالا جا سکتا۔ اس تعلیمی پالیسی کا مقصد کیا ہے یہ تو پالیسی بنانے والے ہی جانیں لیکن اس پالیسی کی وجہ سے دو باتیں ضرور رونما ہوئی ہیں۔ پہلی بات تو یہ کہ بچے خوش ہو گئے ہیں۔ نہ صرف خوش ہو ئے ہیں بلکہ نڈر اور بے قابو بھی ہو گئے ہیں۔ اب انھیں اسکول میں کسی بات سے ڈر نہیں لگتا۔ نہ تو فیل ہونے کا ڈر اور نہ ہی کسی سزا کا ڈر۔ انھیں معلوم ہے اسکول میں بچوں کو سزا دینا یا مارنا اب ایک قانونی جرم بن چکا ہے۔ شکایت کر دینے پر پولیس اساتذہ کو گرفتار بھی کر سکتی ہے۔ اور دوسری بات یہ کہ طلبا کو ملی اس آزادی کی وجہ سے سرکاری اسکولوں میں تعلیم کا کوئی معیار باقی نہیں رہ گیا ہے۔ ان اسکولوں کے تعلیمی معیار کا اندازہ اسی بات سے لگایا جا سکتا ہے کہ اگر آپ صاحب حیثیت ہیں اور بچوں کی تعلیم پر پیسہ خرچ کر سکتے ہیں تو آپ کا بچہ یقینا کسی پرائیویٹ اسکول میں پڑھ رہا ہوگا۔ اگر ایسا نہیں ہے تو آپکو اپنے بچے سے پیار نہیں ہے یا آپ تعلیمی معاملات کو سمجھنے سے قاصر ہیں۔ سرکاری اسکولوں میں پڑھانے والے اساتذہ سے پوچھیں کیا انکے بچے انھیں اسکولوں میں پڑھتے ہیں جن میں وہ خود پڑھاتے ہیں۔ انکی اکثریت کا جواب آپ کو چونکنے پر مجبور کر دے گا۔