کشن گنج، 17 جون 2026 (بدھ):
جمعیت علماء ضلع کشن گنج کے زیرِ اہتمام میرج ہال، کشن گنج میں سہ روزہ مشاورتی اجلاس کا آج افتتاحی نشست کے ساتھ باقاعدہ آغاز ہوگیا۔ اجلاس کے آغاز سے قبل جمعیت کا پرچم لہرایا گیا، جس کے بعد قاری محمد نثار مجکوری نے جمعیت کا ترانہ پیش کیا۔
افتتاحی نشست کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔ جمعیت علماء بہار کے ناظم مولانا محمد ناظم نے ابتدائی کلمات پیش کرتے ہوئے اجلاس کے اغراض و مقاصد پر روشنی ڈالی اور تمہیدی گفتگو کے لیے مفتی جاوید اقبال قاسمی کو دعوتِ خطاب دی۔
اس موقع پر ریاست کے مختلف اضلاع سے تشریف لانے والے علماء کرام، ائمہ، ذمہ داران اور کارکنان کا پرتپاک استقبال کیا گیا۔ منتظمین نے اجلاس میں شریک اہم شخصیات کا تعارف کراتے ہوئے معروف ٹرینر ڈاکٹر محمد ساجد فلاحی (گجرات)، مولانا محمد عمر (بنگلور) اور جمعیت علماء ہند کے ناظمِ عمومی مولانا محمد حکیم الدین قاسمی کی موجودگی کا اعلان کیا۔
اپنے خطاب میں مقررین نے تنظیمی استحکام، دعوتی و اصلاحی سرگرمیوں اور ملت کے اجتماعی مسائل پر سنجیدہ غور و فکر کی ضرورت پر زور دیا۔ منتظمین نے سہ روزہ پروگرام کی تفصیلات بھی پیش کیں اور شرکاء سے اپیل کی کہ وہ اجلاس کے تمام سیشنوں میں بھرپور شرکت کرکے علمی، فکری اور تنظیمی رہنمائی سے زیادہ سے زیادہ فائدہ اٹھائیں۔
واضح رہے کہ یہ سہ روزہ مشاورتی اجلاس جمعیت علماء کے ذمہ داران اور کارکنان کی فکری و تنظیمی تربیت کے مقصد سے منعقد کیا گیا ہے، جس میں مختلف موضوعات پر ماہرین اور اکابر علماء کے خطابات اور تربیتی نشستیں منعقد ہوں گی۔
