کولکاتا: سماج وادی پارٹی کے قومی صدر اور اتر پردیش کے سابق وزیر اعلیٰ اکھلیش یادو نے جمعرات کو کولکاتا میں مغربی بنگال کی وزیر اعلیٰ ممتا بنرجی سے ملاقات کی۔ اس موقع پر ترنمول کانگریس کے جنرل سکریٹری اور رکن پارلیمان ابھیشیک بنرجی بھی موجود تھے۔
ذرائع کے مطابق ملاقات کے دوران موجودہ سیاسی صورتحال، اپوزیشن جماعتوں کے باہمی تعاون اور آئندہ کی سیاسی حکمت عملی پر تبادلۂ خیال کیا گیا۔ اکھلیش یادو نے ممتا بنرجی سے ملاقات کے بعد کہا کہ وہ مشکل حالات میں بھی مضبوطی کے ساتھ کھڑی ہیں۔
کولکاتا پہنچنے پر میڈیا سے گفتگو کرتے ہوئے اکھلیش یادو نے بی جے پی کو تنقید کا نشانہ بنایا۔ انہوں نے الزام لگایا کہ مغربی بنگال میں جمہوری قدروں کو کمزور کرنے کی کوشش کی گئی اور اپوزیشن کو دبانے کی سیاست کی جا رہی ہے۔
سیاسی مبصرین اس ملاقات کو اپوزیشن جماعتوں کے درمیان بڑھتی قربت اور مستقبل میں ممکنہ سیاسی اتحاد کے تناظر میں اہم قرار دے رہے ہیں۔
