چنئی: تمل ناڈو کے نومنتخب وزیر اعلیٰ سی جوزف وجے نے اقتدار سنبھالتے ہی کئی اہم فیصلوں کا اعلان کرتے ہوئے سابقہ ڈی ایم کے حکومت کو سخت تنقید کا نشانہ بنایا ہے۔ حلف برداری کے فوراً بعد انہوں نے گھریلو صارفین کے لیے 200 یونٹ مفت بجلی، خواتین کی حفاظت کے لیے خصوصی فورس اور ہر ضلع میں انسدادِ منشیات یونٹ قائم کرنے کے احکامات جاری کیے۔
وزیراعلیٰ وجے نے کہا کہ ان کی حکومت عوامی فلاح، شفافیت اور بدعنوانی کے خاتمے کو اولین ترجیح دے گی۔ انہوں نے الزام عائد کیا کہ سابقہ حکومت ریاست کو شدید مالی بحران میں چھوڑ کر گئی ہے اور تمل ناڈو پر تقریباً 10 لاکھ کروڑ روپے کا قرض ہے۔ اسی پس منظر میں ان کی حکومت جلد ہی 2021 سے 2026 تک کے مالیاتی معاملات پر ایک تفصیلی وائٹ پیپر جاری کرے گی تاکہ عوام کو ریاست کی حقیقی معاشی صورت حال سے آگاہ کیا جاسکے۔
وجے نے اپنی پہلی سرکاری تقریر میں کہا کہ عوام کے پیسے کا مکمل حساب دیا جائے گا اور حکومت میں شفافیت کو یقینی بنایا جائے گا۔ ان کے مطابق خواتین کے خلاف بڑھتے جرائم پر قابو پانے کے لیے خصوصی سیفٹی فورس تشکیل دی جائے گی، جبکہ نوجوانوں کو منشیات سے بچانے کے لیے ریاست گیر مہم بھی شروع کی جائے گی۔
انہوں نے یہ بھی واضح کیا کہ ان کی حکومت انتخابی وعدوں کو مرحلہ وار نافذ کرے گی اور ریاست میں “حقیقی سماجی انصاف” کے قیام کے لیے کام کرے گی۔
سیاسی مبصرین کے مطابق فلمی دنیا سے سیاست میں آنے والے وجے نے اقتدار سنبھالتے ہی عوامی بہبود اور سخت انتظامی فیصلوں کے ذریعے اپنی سیاسی سمت واضح کردی ہے۔
