مودی کنیت معاملہ، راہل گاندھی نے عدالت عظمیٰ میں ہائیکورٹ کے حکم کو چیلنج کیا
کانگریس کے سابق صدر راہل گاندھی نے مودی کنیت معاملے میں گجرات ہائی کورٹ کے فیصلے کو سپریم کورٹ میں چیلنج کیا ہے۔ اس سلسلے میں کانگریس رہنما نے گجرات ہائی کورٹ کے حکم کے خلاف عرضی دائر کی ہے۔ قابل ذکر ہے کہ سات جولائی کو گجرات ہائی کورٹ نے راہل گاندھی کی اس درخواست کو مسترد کر دیا تھا جس میں انہوں نے مودی کنیت سے متعلق ہتک عزت معاملے میں اپنی سزا پر روک لگانے کا مطالبہ کیا تھا۔ گجرات ہائی کورٹ نے اپنے فیصلے میں راہل گاندھی کی سزا کو برقرار رکھا تھا۔ اس کے ساتھ ہی گجرات ہائی کورٹ نے کہا تھا کہ ٹرائل کورٹ کا سزا کا فیصلہ مناسب ہے۔ مذکورہ فیصلے میں مداخلت کی ضرورت نہیں ہے۔ اس لیے راہل گاندھی کی درخواست خارج کی جاتی ہے۔
