نئی دہلی: سی جے پی (CJP) نے ملک بھر میں "کیا بولتی پبلک” کے نام سے نئی عوامی مہم شروع کرنے کا اعلان کرتے ہوئے چار نکاتی عوامی ایجنڈا جاری کیا ہے۔ تنظیم کا کہنا ہے کہ اس مہم کا مقصد اقتدار حاصل کرنا نہیں بلکہ عوامی مسائل کو مؤثر انداز میں اٹھانا اور حکومتوں کو ان کی ذمہ داریوں کے حوالے سے جواب دہ بنانا ہے۔
سی جے پی کے بانی ابھیجیت ڈپکے نے پریس کانفرنس سے خطاب کرتے ہوئے بتایا کہ یہ مہم آئندہ ستمبر سے ملک گیر سطح پر شروع کی جائے گی۔ انہوں نے کہا کہ تنظیم مختلف ریاستوں میں عوام سے براہِ راست رابطہ قائم کرے گی، ان کے مسائل سنے گی اور انہیں قومی سطح پر اجاگر کرنے کی کوشش کرے گی۔
تنظیم نے اپنے چار نکاتی ایجنڈے میں معیاری اور سب کے لیے قابلِ رسائی تعلیم، نوجوانوں کے لیے روزگار کے بہتر مواقع، حکومتی اداروں میں شفافیت اور جواب دہی کے فروغ، نیز عوامی مسائل پر مسلسل نگرانی اور مؤثر عوامی دباؤ کو اپنی ترجیحات میں شامل کیا ہے۔
ابھیجیت ڈپکے کا کہنا تھا کہ ملک میں بے روزگاری، تعلیم کی بڑھتی ہوئی لاگت، سرکاری تعلیمی اداروں کی کمزور حالت اور عوام کا اداروں پر کم ہوتا اعتماد ایسے بنیادی مسائل ہیں جن پر فوری توجہ دینے کی ضرورت ہے۔ ان کے مطابق سی جے پی ان ہی موضوعات کو اپنی مہم کا مرکز بنائے گی تاکہ حکومتیں عوامی توقعات کے مطابق مؤثر اقدامات کرنے پر مجبور ہوں۔
تنظیم کے مطابق "کیا بولتی پبلک” مہم کے دوران مختلف شہروں اور قصبوں میں عوامی اجتماعات، مکالمے، طلبہ اور نوجوانوں سے ملاقاتیں، عوامی مشاورت اور رکنیت سازی کی مہم بھی چلائی جائے گی، تاکہ زمینی سطح پر عوام کے مسائل کو منظم انداز میں سامنے لایا جا سکے۔
سی جے پی نے واضح کیا ہے کہ وہ فی الحال انتخابی سیاست میں حصہ لینے کا ارادہ نہیں رکھتی، بلکہ ایک آزاد عوامی دباؤ گروپ کی حیثیت سے عوامی مفادات کے تحفظ اور حکومتوں کے احتساب کے لیے اپنی سرگرمیاں جاری رکھے گی۔
