سچ یہ ہے کہ ہمیں سیرت کے پیغام کو سمجھنا پڑے گا اور اپنے ماضی کی طرف رجوع کرنا پڑے گا، صحابہ کرام ہر ہر قدم پر سیرت رسول کے نمونوں سے رہنمائی حاصل کیا کرتے تھے، جب جب لوگوں نے اس سے رہنمائی حاصل کی تب تب غلبۂ دین کی بشارت  پوری ہوتی نظر آئی، آج ضرورت اس بات کی ہے کہ لا تحزن إن اللہ معنا(توبہ:۴۰)ترجمہ: غم مت کر یقینا اللہ ہمارے ساتھ ہے) کی کیفیت سے سرشار ہوا جائے، دعوتی تحریک کو تیز تر کیا جائے، امر بالمعروف اور نہی عن المنکر کے فریضہ کو پورے خلوص کے ساتھ انجام دیا جائے، انی رسول اللہ الیکم جمیعا(اعراف:۱۵۸) (ترجمہ: میں تم سب کا رسول ہوں) کی صدائے بازگشت دنیا کو سنائی جائے، لیکون للعالمین نذیرا کی حقیقت سے دنیا کو روشناس کرا دیا جائے، وما ارسلنٰک الا کافۃ للناس بشیرا للناس بشیرا ونذیرا پر عمل کرکے اتمام حجت کی جائے۔ وما ارسلنٰک الا رحمۃ للعالمین(انبیاء:۱۰۷) (ترجمہ: اور ہم نے آپ کو تمام طبقات کے لئے رحمت بنایا ہے) کے پیام امن ورحمت کو عام کیا جائے، إنی وجھت وجھی للذی فطر السمٰوٰت والارض حنیفا وما أنا من المشرکین۔ (انعام:۷۹) (ترجمہ: میں تو اپنا رخ اس ذات کی طرف کرتا ہوں، جس نے عدم سے آسمانوں اور زمین کو وجود بخشاء میں تو صرف اس کے لئے یکسو ہوں، اور میں شرک کرنے والا ہیں۔)قل إن صلاتی ونسکی ومحیای ومماتی للہ رب العالمین، لا شریک لہ وبذلک امرت وأنا اول المسلمین (سورہ انعام:۶۳-۱۶۴) (ترجمہ: اور یہ بھی کہہ دیجئے کہ میری نماز، اور میری قربانی، اور میری زندگی، اور میری موت سب اللہ کے لئے ہے، جو سب کا مالک و پروردگا رہے، اور جس کا کوئی شریک نہیں اور مجھے اسی کا حکم فرمایا گیا ہے، اور میں تمہارے درمیان پہلا مسلمان ہوں) کے راز کو سمجھا جائے اور خلوص ووفا کے ساتھ زندگی کو دین وملت کی خدمت میں لگا یا جائے، اپنی نسبت صرف اللہ ورسول سے جوڑی جائے اور اسی کے فضل وعطا کو بہتر سمجھا جائے، وقت کے تقاضوں کے مطابق سیرت رسول سے رہنمائی حاصل کی جائے تو یہ ممکن نہیں کہ حالات کے تیور نہ بدلیں ، فضا ہمارے موافق نہ ہو، بس شرط صرف اتنی ہے کہ اسلام کی سر بلندی کے لئے سارے بورڈ ہٹا دیے جائیں، سارے بینر توڑ دیے جائیں، تفریق اور بے سبب راجح و مرجوح کے جھگڑوں کو ختم کرکے تلاوت وتعلیم اور تزکیہ وحکمت کی جامعیت سے فائدہ اٹھایا جائے، مدرسہ واسکول کو اسی کی روشنی میں مفید بنایا جائے، تبلیغ ودعوت کے سارے طریقے استعمال کیے جائیں، تحریک دعوت کو کسی نظریہ اور کسی طریقہ کا پابند نہ کیا جائے بلکہ جس طریقہ، جس حربہ اور جس زبان سے کفار پر اثر ہو اور اہل اسلام کی اصلاح ہو ان سب کا استعمال کیا جائے، واعدوا لھم ما استطعتم من قوۃ (انفال:۶۰) (ترجمہ: اور ان کے مقابلہ کے لئے ہر ممکن طاقت تیار رکھو) کا یہی تو مطالبہ ہے، کہ جس علم سے، جس آلہ سے، جس اسلحہ سے، جس حربہ سے، جس طرح سے بھی ممکن ہو، وقت کا جو چلن ہو، زمانہ کا جو تقاضہ ہو اسے حاصل کیاجائے، یہ تب ہی ممکن ہے جب سیرت نبوی کے ابدی اسوہ سے رہبری حاصل کی جائے اور رہبر کامل کی ہدایات کو اپنی عملی زندگی کا حصہ بنایا جائے، ہر حال میں اسی ذات اقدس کو مقدم رکھا جائے، کیوں نہ ایسا ہوا کہ سیرت پر بیانات کرنے والے عملا ان ہدایات سے فائدہ اٹھاتے، اپنے نصاب ونظام میں تبدیلیاں کرتے، ترقی اور تعمیر کے لئے ماضی قریب نہیں ماضی بعید کی طرف لوٹنا اشد ضروری ہے، طالبان علوم نبوت کیا نہیں کر سکتے اور کیوں نہیں کر سکتے، اگر حکومت کا قیام مشکل اور غلبۂ اسلام ہمارے بس کی بات نہیں، تو کیا اس کی تمنا اور اسلامی نظام کے دوسرے اجزاء کے نفاذ میں بھی ہم مجبور ہیں، کتاب التجارہ کی نبوی ہدایات ہم پڑھیں اور پڑھائیں، مدینہ کے بازار کی تفصیلات کتب سیرت سے نقل کریں اور غیر سودی تجارت اور اسلامی بینکنگ کے راگ اغیار الاپیں، وقت کے مطابق فیصلے کرنا اور سیرت سے استنباط کرنا ہی تو ما ستطعھم من قوۃ کا مطالبہ اور مومنانہ فراست کی دلیل ہے، ہر وہ کام مطلوب ومقصود ہے جس سے اسلام کو تقویت پہنچے اور جس کے ذریعہ دین کی حفاظت واشاعت کا سامان بہم ہو، سیرت نبوی اسی کی طرف تو رہنمائی کرتی ہے اور صحابہ کرام کا یہی تو طرز عمل رہا ہے، ہمارے تخلف کا بڑا سبب یہی ہے کہ ہم نے سیرت کو محض واقعات نگاری تک محدود کر دیا اور اسے تقدس کی نظر سے پڑھنے اور برکت حاصل کرنے تک محدود ہو گئے۔