چیل کے اس حملے سے مجھے یہ اندازہ ہوا کہ وہ اپنے بچوں کے تحفظ کیلئے کتنا سنجیدہ اور دوراندیش ہے ۔اس نے دشمن کے دروازے تک پہنچے  سے پہلے ہی اپنے تحفظ کا بندوبست کر رکھا ہے اور وہ نہیں چاہتا کہ دشمن اس کی سرحد کے قریب سے بھی گزرے ۔شاید اسی لئے وہ چھوٹے چھوٹے حملوں سے اپنے دشمن کو خوفزدہ بھی کرتا رہتا ہے ۔ایک دوسرا واقعہ جو کچھ سات  سال پہلے میرے ساتھ  گجرات میں ایک  شادی سے لوٹتے ہوۓ پیش آیا وہ یہ کہ میں جس آٹو رکشہ سے آرہا تھا وہ راستے میں ہی حادثے کا شکار ہو گیا ۔ساتھ  میں اہلیہ بھی تھیں وہ دیگر مسافروں کے بیچ میں ہونےکی وجہ سے صاف بچ گئیں میں  کنارے پر ہونےکی وجہ سے زمین پر کسی پتھر سے ٹکرا گیا اور سر میں چوٹ آئی ۔وہیں بے ہوش ہو گیا ۔راہگیروں نے سب کو باہر  نکالا اور  ایمبولینس بلائی ۔ایمبولینس بمشکل دس منٹ میں حادثے کی جگہ پر پہنچ گئی ۔جس اسپتال میں پہنچا انہوں نے فوراً سٹی اسکین کیلئے مجھے مشین میں ڈال دیا اور انھیں فوری طور پر مجھے جو دوا وغیرہ دینا تھا وہ دینا شروع کردیا ۔کوئی چار پانچ گھنٹے کے بعد میں ہوش میں تو آگیا لیکن سر کو تھوڑا بھی جنبش دیتا تو چکر کھا کر گرجاتا۔ڈاکٹر  نے کہا آپکو تقریباً تین  مہینے تک ایسا ہوتا رہے گا ۔میں نے کہا کیا میں گھر جاسکتا ہوں ۔ڈاکٹر نے کہا اگر ہمت کرسکتے ہیں تو ہم کچھ دوائیاں لکھ دیتے ہیں آپ گھر پر ہی جاکر آرام کریں ۔ہاسپٹل سے نکلنے سے پہلے ہاسپٹل کا پیسہ ادا کرنے کیلئے اخراجات کی بل مانگی گئی تو بل دیکھ کر حیرت ہوئی ۔حادثے کے مقام سے ایمبولینس کے ذریعے ہاسپٹل لانے اور سٹی اسکین کے علاوہ دواؤں اور بیڈ کا جو خرچ پیش کیا گیا وہ صرف تین ہزار روپئے تھا ۔اگر یہی حادثہ ممبئی یا مہاراشٹر کے قریب ہوا ہوتا تو پرائیویٹ اسپتال پچاسوں ہزار کی بل بنا دیتے لیکن گجرات میں آج بھی ایسے اسپتال ہیں جہاں بائی پاس سرجری جس کا خرچ ممبئی میں چار سے پانچ لاکھ آتا ہے وہاں ایک لاکھ روپئے میں ہو جاتا ہے ۔خود ممبئی میں بھی جو ٹرسٹ کے اسپتال ہیں وہاں آج بھی پرائیویٹ اسپتال کی بنسبت آدھے پیسے میں علاج ہو جاتا ہے ۔جوگیشوری ممبئی میں ملت اسپتال کسی حد تک غریب مریضوں کو راحت پہچا رہا ہے ۔