تاریخ کا ایک گمشدہ کردار عطیہ فیضی !

اس میں کوئی شک نہیں کہ عطیہ فیضی کا تعلق نہ صرف علامہ اقبال اور علامہ شبلی سے تھا وہ ایک ایسی اعلی تعلیم یافتہ خاتون اور اپنے وقت کا مشہور چہرہ تھیں کہ اس وقت کی ساری عبقری شخصیات عطیہ فیضی سے متعارف تھیں ۔یہ ان کی شہرت اور تعلیم ہی تھی کہ جب پاکستان قائم ہوا تو محمد علی جناح کی دعوت پر وہ اپنے شوہر سموئیل رحمان جو کرشچین سے مسلمان ہو گئے تھے ان کے ساتھ پاکستان منتقل ہو گئیں ۔اب کیا کہا جاۓ کہ عطیہ فیضی کا جناح سے بھی معاشقہ تھا ۔عطیہ فیضی نہ صرف ایک اچھی مصور تھیں انہیں تاریخ اور فلسفہ پر بھی عبور حاصل تھا ۔علامہ شبلی اور ان کی عمر میں بیس سال کا فرق تھا اور جس وقت وہ اپنی جوانی میں علامہ شبلی کے رابطے میں آئیں اس وقت ان کی عمر کے شبلی کے بیٹے اور بیٹیاں تھیں ۔اس کے باوجود کہا جاسکتا ہے کہ عشق ہو سکتا ہے لیکن یہ بات غلط ہے ۔یہ وہ دور تھا جب تعلیم یافتہ شخصیات اپنے سے زیادہ تعلیم یافتہ شخصیات کی رہنمائی کی حریص ہوتی تھیں ۔چونکہ علامہ شبلی اپنے دور میں تاریخ کے استاد کہے جاتے ہیں اور عطیہ فیضی کا عنوان بھی تاریخ رہا ہے اس لئے رہنمائی کیلئے خط و کتابت کے سلسلے سے نہ تو شبلی نے انکار کیا اور نہ ہی عطیہ نے ۔اس تعلق کو عاشق اور محبوب میں تبدیل کردینا شرپسندانہ حرکت ہے ۔ہاں علامہ اقبال کے تعلق سے کہا جاسکتا ہے کہ ہو سکتا ہے دونوں میں ایسی کوئی بات رہی ہو اور وہ اس کا اظہار نہ کر سکے ہوں ۔جیسا کہ دونوں کی عمر ایک ہی تھی اور دونوں کی ملاقات کیمبرج میں اس وقت ہوئی جب علامہ نے پی ایچ ڈی کیلئے کیمبرج میں داخلہ لیا تھا اور علامہ نے لاء کی ڈگری بھی لندن سے ہی لی تھی ۔چونکہ دونوں کا تعلق برصغیر کے مسلم خاندان سے تھا اور عطیہ اس یونیورسٹی میں پہلی مسلم خاتون تھیں اس لئے اقبال کا ہم وطن اور اہل زبان ہونے کی وجہ سے ان کے رابطے میں آنا بھی فطری بات تھی ۔لیکن یہ بھی کہا جاتا ہے کہ علامہ اس وقت شادی شدہ تھے ۔ممکن ہے دونوں کے اندر ایسے کوئی محبت کے جذبات رہے ہوں تو اس میں برائی کیا ہے ۔اقبال اور عطیہ کے درمیان جو خطوط کے ذریعے گفتگو ہوئی ہے وہ بھی کتابی شکل میں شائع ہو چکے ہیں ۔اگر دونوں کی نیت میں فتور ہوتا تو یہ خطوط منظر عام پر ہی کیوں آتے ۔ویسے جب دونوں کالج کے ماحول میں بے پردہ مل سکتے تھے اور یہ بھی آتا ہے کہ علامہ نے عطیہ کو کھانے کی دعوت پر بھی مدعو کیا تھا اور ممکن ہے کہ ان کی اور بھی ملاقاتیں بھی ہوتی رہی ہوں تو یہ بھی ممکن ہے کہ دونوں ایک دوسرے کو محبت کی نظر سے بھی دیکھتے رہے ہوں مگر حالات نے دونوں کا ساتھ نہ دیا ہو کہ وہ شادی کے بندھن میں بندھ جاتے !۔