جاؤ ! دعوت وتبلیغ کا آغاز اپنی ذات سے کرو۔

• ایک آدمی نے حضرت عبداللہ بن عباسؓ سے کہا:میں دعوت وتبلیغ کا کام کرنا چاہتا ہوں، لوگوں کو نیکی کی تلقین کروں گااور برائی سے روکوں گا۔

 انہوں نے کہا: کیا تم اس مرتبہ پر پہنچ چکے ہو؟۔

 اس نے کہا: ہاں توقع تو ہے۔

 ابن عباسؓ نے کہا: اگر یہ اندیشہ نہ ہو کہ قرآن مجید کی تین آیتیں تمہیں رسوا کردیں گی تو ضرور تبلیغِ دین کا کام کرو۔

:اس نے پوچھا: وہ کون سی تین آیتیں ہیں؟ابن عباس ؓ نے فرمایا: پہلی آیت یہ ہے

 أتَأمُرُوْنَ النَّاسَ بِالْبِرِّ وَتَنْسَوْنَ أنْفُسَكُمْ 

 کیا تم لوگوں کو نیکی کا وعظ کہتے ہو اور اپنے کو بھول جاتے ہو۔

 تو بتاؤ !   اس پر اچھی طرح عمل کرلیا ہے؟۔ اس نے کہا: نہیں

 فرمایا: دوسری آیت یہ ہے

 لِمَ تَقُوْلُوْنَ مَا لاَ تَفْعَلُوْنَ، كَبُرَ مَقْتًا عِنْدَ اللهِ أنْ تَقُوْلُوْا مَا لاَ تَفْعَلُوْنَ 

تم وہ بات کیوں کہتے ہو جس پر عمل نہیں کرتے، بہت ہی بری بات ہے وہ جو تم کہتے ہو لیکن کرتے نہیں ہو۔

 بتاؤ !  اس پر اچھی طرح عمل کرلیا ہے؟۔

 اس نے کہا: نہیں۔

 ابن عباسؓ نے فرمایا

تیسری وہ آیت  جو شعیب علیہ السلام نے اپنی قوم سے کہی تھی

 مَا أرِيْدُ أنْ أُخَالِفَكُمْ إلٰى مَا أنْهَاكُمْ عَنْهُ

جن بری باتوں سے میں تمہیں روکتا ہوں تو میرا قطعا یہ ارادہ نہیں کہ تم کو روک کر خود آگے بڑھوں اور یہ برے کام کرنے لگوں۔

ابن عباسؓ نے پوچھا

 اس پر اچھی طرح عمل کرلیا ہے؟ اس نے کہا: نہیں۔

فرمایا:جاؤ ! دعوت وتبلیغ کا آغاز اپنی ذات سے کرو۔