لوک سبھا میں خواتین کو 33 فیصد ریزرویشن دینے سے متعلق 131ویں آئینی ترمیمی بل کے پاس نہ ہو پانے کے بعد وزیر اعظم نريندر مودي نے ہفتہ کی رات قوم سے خطاب کیا۔ اپنے خطاب میں انہوں نے کہا کہ حکومت نے خواتین کو مناسب نمائندگی دینے کی بھرپور کوشش کی، مگر اپوزیشن جماعتوں کی مخالفت کے باعث یہ بل منظور نہیں ہو سکا۔ انہوں نے اس صورتحال پر افسوس کا اظہار کرتے ہوئے یقین دلایا کہ خواتین کے حقوق اور ان کی سیاسی شمولیت کو یقینی بنانے کے لیے حکومت اپنی کوششیں جاری رکھے گی۔
وزیر اعظم نے اپوزیشن، خصوصاً کانگریس کو ہدفِ تنقید بناتے ہوئے کہا کہ سیاسی مفادات کو قومی مفاد پر ترجیح دی گئی، جس کا نقصان ملک کی خواتین کو ہوا۔ انہوں نے کانگریس کو اصلاحات مخالف قرار دیتے ہوئے الزام لگایا کہ جب بھی اہم قانون سازی کی کوشش کی جاتی ہے، اپوزیشن اس کی راہ میں رکاوٹ بنتی ہے۔
ادھر، بل کی ناکامی کے خلاف حکمراں جماعت بھارتيه جنتا پارٹي کے لیڈروں اور کارکنوں نے دہلی میں کانگریس رہنما راهل گاندھي کی رہائش گاہ کے باہر احتجاج کیا۔ مظاہرے میں خواتین کارکنان بھی شامل تھیں، جنہوں نے اپوزیشن پر خواتین کو ریزرویشن سے محروم رکھنے کا الزام عائد کیا۔ مظاہرین کا کہنا تھا کہ ملک کی آدھی آبادی اس فیصلے کو کبھی معاف نہیں کرے گی۔
یہ پورا معاملہ اس وقت شدت اختیار کر گیا جب خواتین ریزرویشن بل لوک سبھا میں مطلوبہ اکثریت حاصل کرنے میں ناکام رہا، جس کے بعد سیاسی حلقوں میں کشیدگی بڑھ گئی اور حکومت و اپوزیشن کے درمیان لفظی جنگ تیز ہو گئی۔
