میں خود کو اس کا اہل نہیں سمجھتا

  سب سے اوپر جو عنوان قائم کیا گیا ہے،اس کی تفصیلات کو پڑھنے سے پہلے مندرجہ ذیل نوٹ کو پڑھ لیں :

امارت شرعیہ کے بارے میں رات یہ افسوس ناک خبر ملی کہ جھارکھنڈ امارت شرعیہ اب الگ قائم ہوگئی اور اس کے امیر مولانا مفتی نذر توحید صاحب بن گئے ہیں اور بہت سے علماء کرام نے ان کے ہاتھ پر بیعت کر لی ہے ۔ اس خبر کو سن کر تعجب ہوا اور حیرت بھی ، سواد ملت سے کٹ کا چند لوگوں نے یہ کیا فیصلہ کرلیا اور اتحاد و اجتماعیت کیوں پارہ پارہ کردیا گیا؟؟۔ لیکن ماضی میں امیر شریعت کے انتخاب کے وقت جو طرز اور رویہ اختیار کیا گیا اور بعد میں جو انتقامی کارروائی کی گئی اور بعض قابل ذکر افراد کو جن کی قربانیوں کو کبھی فراموش نہیں کیا جاسکتا، ان کو جس طرح سے دودھ سے مکھی کی طرح نکال دیا گیا، اس سے یہ قیاس لگایا جارہا تھا کہ مستقبل میں غیر یقینی صورتحال کا سامنا امارت کو کرنا پڑے گا ۔

امیر شریعت کے انتخاب کے وقت راقم الحروف نے امارت شرعیہ کے ذمہ داروں کو لکھا تھا کہ جھارکھنڈ پر امارت کی توجہ نہ کے برابر ہے ،اور اس صوبہ کو ہمیشہ نظر انداز کیا گیا ہے ۔ آج تک یہاں سے کسی ناظم نائب ناظم معاون ناظم کا انتخاب نہیں ہوا ،اس لئے امارت کو چاہیے کہ اڑیسہ اور جھارکھنڈ سے ایک ایک نائب امیر شریعت یا نائب ناظم منتخب کیا جائے ۔ لیکن اس پر کبھی کوئی توجہ نہیں دی گئی ،علماء جھارکھنڈ کی جانب سے بارہا اس کا مطالبہ بھی کیا گیا ۔ لیکن اس کے باوجود اس سے بے اعتنائی برتی گئی ۔

   اس وقت علماء اور اہل علم دو حصوں میں بٹ کر بیان بازی کر رہے ہیں اور ایک دوسرے کے خلاف نازیبا الفاظ و کلمات بھی استعمال کر رہے ہیں ، اور جو چاہ رہے ہیں لکھ مار رہے ہیں۔

  میری رائے ہے کہ امارت شرعیہ کے معزز عہدے داران مل بیٹھ کر اس مسئلہ کو حل کریں، اخباری بیان بازی سے پرہیز کریں ، میڈیا کو مواد فراہم نہ کریں اور سب سے ضروری بات یہ کہ جھارکھنڈ اور اڑیسہ کو بھی مناسب نمائندگی دیں اور ایک ایک نائب امیر شریعت اور ایک ایک نائب ناظم دونوں ریاستوں سے منتخب کریں ۔ اگر ایسا نہیں کریں گے تو مسئلہ کا صحیح حل نہیں ہوسکے گا ۔ قرآن مجید نے قولوا قولا سدیدا کا حکم دیا ہے ۔ اس لئے حق بات کہنے اور حق بات سمجھنے کی کوشش ہر ایک کو کرنی چاہیے ۔۔۔ میرے پاس بہت سے لوگوں کے فون آئے کہ آپ کا موقف کیا ہے ؟ میں نے خاموشی اختیار کی ۔ لیکن پھر احساس ہوا کہ نہیں اپنا بے لاگ موقف انسان کو ظاہر کردینا چاہیے ۔۔ میں خود جھارکھنڈ کا ہوں ،اس لئے میرا خیال اور میری رائے ہے کہ فریقین مل بیٹھ کر مسئلہ کا حل نکالیں ، مولانا مفتی نذر توحید ایک صاحب بصیرت اور متدین عالم دین ہیں، وہ بھی سواد اعظم کی طرف لوٹ آئیں اس جذباتی فیصلہ کو کالعدم کریں ،اپنے موئیدین کو سمجھائیں اور جو شکایات ہیں ان کو سامنے لائیں، اور ذمہ داران امارت شرعیہ ،جھارکھنڈ کو مناسب نمائندگی دیں ،ان کے ساتھ سوتیلہ رویہ نہ اپنائیں ۔ نیز جو علماء اور اہل علم مفتی نذر توحید صاحب کے لئے نازیبا کلمات استعمال کر رہے ہیں، وہ بھی اپنی زبان پر لگام لگائیں ، مجھے اس کی کوئی پرواہ نہیں کہ میری اس تحریر پر آپ لوگ کیا تبصرہ کریں گے ، مجھے جو صحیح اور درست سمجھ میں آیا وہ میں نے لکھ دیا ہے ۔